Çuditërisht për një vit të moskonstituimit të institucioneve të Kosovës nuk pati asnjë demonstratë

Shkruan: ANALISTI-Nue Oroshi

Sa i përket bojkotimit të këtyre zgjedhjeve, unë mendoj se bojkotin e parë ua ka bërë mërgata. Për të votuar me postë, si dhe nëpër konsullatat dhe ambasadat e Republikës së Kosovës, janë regjistruar diku rreth 77.049 persona. Ky numër është shumë i vogël në krahasim me numrin e mërgimtarëve që jetojnë në Evropë dhe Amerikë. Diku as 10% e votuesve me të drejtë vote që jetojnë në mërgim nuk janë regjistruar për të votuar.

Lexoni edhe:

Aktakuza e Prokurorisë ndaj Shpend Ahmetit është paralajmërim për dështimin e shtetit në kontrollin e zyrtarëve të lartë

-Kurse sa i përket bojkotit të brendshëm, unë mendoj se shumica do të dalë në zgjedhje dhe do të votojë. Do të votojë për faktin se dikush është i lidhur me partinë, dikush është i lidhur me kandidatët, dikush është militant i punësuar në sektorin publik e dikush tjetër i punësuar në sektorin privat.

Partitë i kanë bllokuar institucionet e Republikës së Kosovës për një vit, por uroj që kjo bllokadë të mos zgjasë edhe për një vit tjetër, sepse reagimi i një punëtori shqiptar, në mënyrë të vrazhdë, se i kishte kaluar miu nëpër mustaqe derisa flinte, ishte shumë domethënës. E derisa shokët e pyetën se nuk u bë nami pse kaloi miu nëpër mustaqe, ai u përgjigj: Nuk u bë nami për një herë, por kam frikë mos po e bën rrugë.

Edhe ne po kemi frikë se mos këtyre politikanëve ka filluar t’u pëlqejë anarkia, sepse e kanë më lehtë të harxhojnë buxhetin e shtetit kur nuk i japin përgjegjësi askujt. Dhe, çuditërisht, për një vit të moskonstituimit të institucioneve të Republikës së Kosovës nuk pati asnjë demonstratë, përveç, me sa më duket, një avokati që i kishte qethur flokët.

Shkrimet në këtë rubrikë nuk shprehin qëndrimet e gazetës "Kosova Sot Online".