SINJALIZIM QË NDËRGJEGJJA KOMBËTARE DHE SHTETI TË ZGJOHEN NGA GJUMI!...

Shkruan gazetari Ismail Muçiqi.

Jemi të shqetësuar për fatin e Kosovës, për integritetin dhe sovranitetin e saj, i cili po sfidohet nga Serbia dhe armiqtë e Kosovës. Por edhe më shumë jemi të shqetësuar dhe të brengosur për rrezikun që po i kanoset shtetit të Kosovës nga brenda, nga njerëzit antikombëtarë. Serbia, përmes formave të ndryshme subversive, përmes grupeve dhe shërbimeve inteligjente, po rekruton bashkëpunëtorë të shitur për të punuar për interesat e saj në Kosovë. Është e pabesueshme ndoshta për opinionin, por këto ditë në emisionin Kallxo.com, gazetari hulumtues shumë profesional dhe i besueshëm, Kreshnik Gashi, deklaroi publikisht se Serbia është duke futur para me miliona cash në Kosovë përmes individëve dhe grupeve, të cilët po e realizojnë misionin e Serbisë në Kosovë përmes propagandës informative në dëm të shtetit.

Po në këtë emision, gazetari Gashi deklaroi se Kosova është në rrezik edhe nga disa avokatë shqipfolës, të cilët i kanë mbrojtur dhe po i mbrojnë strukturat kriminale të Serbisë në veri të Kosovës – anomali kjo që tregon fytyrën e vërtetë të këtyre palaçove që, për interesat e tyre materialo-financiare, punojnë kundër atdheut. Nuk ka dyshim se këto veprime antikombëtare po i bëjnë individë të caktuar, të veshur me petkun e gazetarisë apo te avokateve, duke i bartur kauzat armiqësore të Serbisë nëpër debatet e ndryshme politike. Shtrohet pyetja: çfarë vlere intelektuale apo njerëzore, e mos të flasim kombëtare, mund të ketë individi i cili i thotë vetit avokat, i cili ka pranuar t’i mbrojë kriminelët serbë, të cilët natë e ditë punojnë për zhbërjen e Republikës së Kosovës? Këtë situatë të rrezikshme po e shfrytëzojnë armiqtë e Kosovës, mu në kohën kur institucionet e shtetit janë të paformuara për shkak të veprimeve të papërgjegjshme të deputetëve të Parlamentit të Kosovës, të cilët përmes bllokadave e kanë pezulluar funksionimin e shtetit. Më thotë mendja se është koha e fundit që organet e sigurisë, Prokuroria dhe AKI-ja të veprojnë kundër këtyre rrymave dhe grupeve destruktive, me emra dhe mbiemra Shqiptarë, të cilët me vetëdije po punojnë kundër shtetit. Institucionet e sigurisë dhe shërbimi i inteligjencës duhet të veprojnë në momentet kur në mjetet e informimit shfaqen kauza të karakterit destabilizues që e rrezikojnë sigurinë e shtetit dhe të popullit. Andaj, vetëdija e ndërgjegjes kombëtare po troket dhe po kërkon veprim ligjor e shtetëror, ende pa u bërë vonë.

Shkrimet në këtë rubrikë nuk shprehin qëndrimet e gazetës "Kosova Sot Online".