Sot derbi i Premierligës, Manchester United – Arsenal
Është vërtet e habitshme sa shpejt ndryshojnë gjërat në futboll. Vetëm katër javë më parë, pas disfatës së rëndë me Tottenham-in e armikut Jose Mourinho brenda në Old Trafford, Ole Gunnar Solskjaer ishte pothuajse i shkarkuar dhe bookmakers-at më të famshëm britanikë e kuotonin si trajnerin e parë që do të largohej nga stoli në këtë edicion të Premier League-s.
E pra në më pak se një muaj trajneri norvegjez ndryshoi krejt ecurinë e “djajve të kuq” por gjithashtu edhe fatin e tij të mëtejshëm, për të cimentuar postin në krye të klubit më të lavdishëm në historinë e kampionatit anglez. Tre fitore me kundërshtarë si Neëcastle, Paris SG dhe Leipzig, si dhe barazimi me Chelsea-n brenda në “Teatrin e Ëndërrave” kthyen në rrugën e duhur “red devils”, që tani bëhen gati për një sfidë të nxehtë me Arsenalin në Premiership.
Natyrisht që bëhet fjalë për një klasike të futbollit anglez dhe dy klube që krijuan një rivalitet të egër në historinë e Premier League-s, sidoqoftë për hir të së vërtetës pavarësisht përpjekjeve shumë të mëdha që po bëjnë drejtuesit respektivë dy skuadrat kanë humbur shumë nga shkëlqimi i tyre i dikurshëm. Ky është sezoni i parë që nga edicioni i largët 1972-73 që Manchester United nuk ka fituar në Old Trafford asnjë nga tre sfidat e para në kampionatin anglez. Sivjet “djajtë e kuq” kanë dështuar për të marrë 3 pikët në shtëpi me tre kundërshtarët nga Londra si Crystal Palace, Tottenham Hotspur dhe Chelsea, ndërsa në fundin e kampionatit të kaluar United barazoi me radhë me ekipe si Southampton e Ëest Ham, duke rrezikuar jo pak kualifikimin për në Champions League. Në fund pikërisht falë triumfit brenda në King Poëer Stadium “red devils” rekuperuan plot 14 pikë disavantazh që kishin në muajin janar ndaj Leicester City-t, për t’i flakur “dhelprat” jashtë katërshes më të mirë të Premier League-s, një kampionat i gjatë, stresues, plot luhatje dhe i ndërprerë nga pandemia e koronavirusit, por që gjithsesi e renditi ekipin e drejtuar nga trajneri nordik në pozicionin e tretë, plot 10 pikë larg “topcinjve”, që e mbyllën aventurën e tyre vetëm në vendin e tetë.
Pas humbjes me “gjelat” OGS i dhanë vetëm një muaj kohë, megjithatë fati i 47-vjeçarit nga Kristiansundi ndryshoi në St. James’ Park, pikërisht në 86’ pas golit të shkëlqyer që realizoi Bruno Fernandes, pas topit të shërbyer në mënyrë të mrekullueshme nga Marcus Rashford. Në katër sfidat e fundit në të gjithë kompeticionet United ka reaguar në mënyrën më të mirë të mundshme, duke shënuar 11 gola dhe pësuar vetëm 2. “Red devils” vërtet nuk fitojnë prej pesë ndeshjesh radhazi brenda në kampionat, gjithsesi cfarëdo lloj rezultati që të prodhojë fusha në “Teatrin e Ëndërrave”, Solskjaer përsëri do t’ia dalë për ta kaluar mësuesin e tij Alex Ferguson në 100 ndeshjet e para për United. Ole ka regjistruar si trajner 55 fitore, 21 barazime dhe 23 humbje në 99 ndeshjet e para me “djajtë e kuq”, sidoqoftë shumë larg Jose Mourinho-s, që ka fituar 62 % të ndeshjeve në 100 sfidat e para me “red devils”.
Nga shumë vetë Solskajer kritikohet për mungesën e guximit dhe mënyrën e tij të vetme efikase të lojës, që është kundërsulmi, gjithsesi është fakt që trajneri norvegjez ka mposhtur tre herë Guardiolën te City, dy herë Tuchel-in te Paris SG, plot 4 herë Chelsea-n, si me Sarri-n ashtu edhe trajnerin Frank Lampard në drejtim, plus edhe në një rast vetë jose Mourinho-n, pa harruar aspak edhe dy raste kur 47-vjecari ka bllokuar në barazim trajnerin e momentit në ishull, gjermanin Jurgen Klopp. Natyrisht që shumë vetë vazhdojnë të jenë skeptikë dhe mosbesues ndaj tij, megjithatë ky është cmimi që duhet të paguajë një trajner te United, pavarësisht se Ole vazhdon të mbetet një idhull i tifozerisë te “djajtë e kuq”. Sigurisht në fushë janë futbollistët ata që luajnë, megjithatë sërish vijon të flitet më tepër pikërisht për trajnerët.
Në krahun tjetër qëndron Mikel Arteta, që në harkun e vetëm katër javëve i dha klubit si trofeun në FA Cup dhe pjesëmarrjen në Kupat e Evropës ashtu edhe Superkupën, duke mposhtur në Community Shield pikërisht Liverpulin e Jurgen Klopp-it. Ndonëse i ka fituar dy sfidat në Europa League ekipi i Arsenalit do të zbresë në Old Trafford pas humbjeve radhazi në kampionat me kundërshtarë të fortë, si Manchester City dhe Leicester, për më tepër pa gjetur dot as rrugën e rrjetës. Interesant është fakti që në “Teatrin e Ëndërrave” do të masë forcat klubi më i suksesshëm në historinë e kampionatit anglez, me klubin që ka fituar më shumë trofe në FA Cup, gjithsesi Arsenali dhe United pozicionohen për momentin në gjysmën e dytë të klasifikimit të përgjithshëm, me “gunners” që numërojnë vetëm 2 pikë më tepër në tabelën e renditjes.
Te vendasit do të vazhdojë të vuajë skualifikimin sulmuesi Anthony Martial, ndërsa braziliani Alex Telles vijon të jetë pozitiv me virusin Covid – 19, ndërkohë në krahun tjetër 38-vjecari bask ka me probleme fizike qendërmbrojtësin David Luiz. Në divizionin elitar të futbollit anglez të klubeve kjo është sfida e 183 ndërmjet këtyre dy ekipeve. United kryeson bilancin në kampionat 75 – 62 me fitore, me një golaverazh të përgjithshëm 272-247. Takimi do të luhet në orën 17:30 në Old Trafford dhe do të drejtohet nga arbitri veteran, 52-vjecari nga Merseyside Mike Dean.
(Kosova Sot Online)
