Fillon edicioni i ri në Bundesligë, Nagelsmann e fillon sonte aventurën e tij me Bayernin në nivelin elitar të futbollit gjerman
Emocionet e ligave më të mëdha evropiane rikthehen përsëri sonte pas një pauze të gjatë verore.
La Liga, Premier League dhe Bundesliga e fillojnë në këtë javë aktivitetin për edicionin e ri.
Bayern Munich e luan sonte ndeshjen e parë ndaj Borussia Monchengladbach.
Kampioni absolut i Gjermanisë, Bayern Munich do të tentojë që ta fillojë mbarë sezonin e ri në “Borussia-Park”. Ka pasur ndryshime të mëdha në stafin teknik të kësaj skuadre.
Largimi i Hansi Flick dhe ardhja e trajnerit të ri Julian Nagelsmann, natyrisht që ka ndryshuar edhe formën e lojës që kjo skuadër do të aplikojë.
Megjithatë, ndeshjet para-sezonale nuk kanë qenë aspak pozitive për skuadrën bavareze. Nga katër ndeshje të luajtura, tri i humbi, kurse një përfundoi me barazim.
Pikërisht ishte Borussia Monchenglabach ajo që e mposhti Bayernin në një miqësore me rezultat 2 me 0, por kujtojmë që ndeshja e fundit zyrtare mes këtyre dy skuadrave kishte përfunduar me rezultat 6 me 0 për bavarezët.
Ndeshja e sontme zhvillohet në ora 20:30.
(Kosova Sot Online)