Muminoviq afër medaljes së bronztë në Botërorin U-21
Xhudistja pejane do ta kërkojë medaljen e bronztë përmes repesazhit. Ajo deri tash i ka fituar tri luftëra dhe e ka humbur vetëm një, atë në gjysmëfinale. Erza do të mundohet të përfundojë në podium në kategorinë deri në 52 kilogramë
Erza Muminoviq është shumë afër ta fitojë medaljen e bronztë në Kampionatin Botëror U-21, i cili po mbahet në Olbia të Italisë.
Xhudistja kosovare arriti deri në gjysmëfinale, por aty u ndal nga italiania Giulia Carna.
E tash, medaljen e bronztë do ta kërkojë përmes repesazhit, ku do të përballet me spanjollen Ariane Toro Soler.
Erza e kaloi rrethin e parë të kategorisë deri në 52 kilogramë pa luftë, shkruan Gazeta Express.
Në atë të dytë e mposhti mongolezen Sarantuya Delgersaikhan.
Ndërkaq, në rrethin e tretë ishte më e mirë se amerikania Marisol Torro.
E më tutje, në çerekfinale ia doli ta mposht xhudisten nga Azerbajxhani, Sabina Aliyeva.
Pra, deri tash ajo i fitoi tri luftëra dhe e humbi një.
Shpresojmë që Erza ta fitojë medaljen e bronztë në këtë kompeticion prestigjioz për moshën e saj.
(Kosova Sot Online)