Momenti kur presidenti historik Rugova i bënte dhuratë futbollistit të Kombëtares së Kosovës

  • E.K /
  • 21 janar 2022 - 14:07
Momenti kur presidenti historik Rugova i bënte dhuratë futbollistit të Kombëtares së Kosovës

Shukri Paqarada, njëri prej portierëve më të mirë në histori të futbollit kosovar, e ka kujtuar një moment të pashlyeshëm për të dhe për familjen e tij.

Në fakt, në përvjetorin e 16-të të vdekjes së presidentit historik Ibrahim Rugova, Paqarada e ka postuar një fotografi domethënëse në rrjetet sociale.

Aty shihet presidenti i ndjerë, bashkë me ish-anëtarin e partisë së tij, Xhemajl Mustafa, po ashtu i ndjerë, duke ia bërë një dhuratë të birit të Shukriut.

E në këtë rast, i biri i tij është lojtari i Kombëtares së Kosovës, Leart Paqarada.

Ai e ka sqaruar edhe domethënien e dhuratës që e kishte marrë futbollisti aktual i St Paulit kur ishte fëmijë.

“Një kujtim i paharruar Presidenti Rugova dhe Xhemajl Mustafa natën e vitit të ri 1999 duke ja dhuruar Leartit dhe Sationës gurët e kosovës me fjalët“ Kur të rritëni ta kujtoni kryetarin e parë të Kosovës”, ka shkruar Paqarada senior.

Leart Paqarada është lindur dhe rritur në Gjermani, pasi babai i tij kishte migruar drejt Perëndimit në vitet e 90-ta.

(Kosova Sot Online)