I huazuari nga Arsenali te Marseille, Saliba merr vendim për të ardhmen e tij

William Saliba raportohet se nuk dëshiron që të rikthehet te Arsenali.

Qendërmbrojtësi nënshkroi me londinezët në verën e vitit 2019, por nuk bëri asnjë paraqitje zyrtare për skuadrën.

Saliba këtë sezon e kaloi si i huazuar te Marseille, teksa në dy sezonet e kaluara ishte i huazuar te Saint-Etienne dhe Nice.

Sipas “RMC Sport”, 21-vjeçari ia ka bërë të qartë krerëve të klubit francez se e dëshiron qëndrimin në “Velodrome”.

Edhe trajneri i Marseilles, Jorge Sampaoli, raportohet se e ka bërë prioritet nënshkrimin me Saliban.

Sampaoli thuhet se ka kërkuar nga krerët e klubit që të blejnë kartonin e lojtarit të Arsenalit.

Nuk përjashtohet marrëveshja e huazimit të tij edhe për sezonin e ardhshëm, por që të përfshihet opsioni ose detyrimi i blerjes përfundimtare të tij në verën e vitit të ardhshëm.

William Saliba ka kontratë të vlefshme me Arsenalin deri më 30 qershor 2024.

(Kosova Sot Online)