Mbappe bëhet shkak i largimit të Neymarit nga PSG-ja?

  • S.A /
  • 29 June 2022 - 10:20
Mbappe bëhet shkak i largimit të Neymarit nga PSG-ja?

Nuk ka paqe në shtëpinë e Paris Saint-Germainit.

Pas vazhdimit të kontratës së Kylian Mbappes dhe largimit të Leonardos dhe Pochettinos, tash “tërmeti” i radhës quhet Neymar.

Në ditët e kaluara presidenti Nasser Al Khelaifi kishte folur për ndryshimin e politikës, duke i lënë anash transferimet multimilionëshe, në mënyrë që të llogarisë në të rinjtë e ekipit.

E tash duket se radhën për t’u larguar e ka Neymari, i cili është lojtari më i kushtueshëm në histori të futbollit.

Sipas mediumit spanjoll “El Pais”, PSG-ja ia ka komunikuar yllit brazilian vendimin për ta shitur atë gjatë kësaj vere.

Gjithnjë sipas këtij mediumi, ishte Mbappe ai që e ka kërkuar largimin e “O Ney” pasi ylli francez nuk e ka vlerësuar sjelljen e brazilianit në stërvitje dhe faktin se ai lëndohet shpesh.

Prandaj, klubi nga “Parku i Princave” dëshiron të heq dorë nga ish-futbollisti i Santosit dhe i Barcelonës.

Klubi francez e di se nuk mund ta shesë një lojtar të tillë, i cili i merr 40 milionë euro rrogë dhe këtë do ta bëjë deri në vitin 2027.

Për këtë arsye, nuk përjashtohet mundësia e huazimit të tij dhe që klubi francez ta paguajë një pjesë të rrogës së tij.

Mbetet të shihet se kush dhe kur do të dalë një klub i interesuar për ta shfrytëzuar këtë mundësi për brazilianin.

(Kosova Sot Online )