Skuadra e Muriqit reziston dhe merr një pikë kundër Bilbaos

Mallorca ka arritur që të marrë një barazim shumë të vlefshëm në ndeshjen e parë të La Ligës. Vedat Muriqi luajti në këtë ndeshje për 86 minuta duke bërë një ndeshje të mirë.

Mallorca e ka filluar mirë sezonin e ri në La Liga pasi që ka arritur të kthehet me një pikë në ishull, në një ndeshje ku Athletic Bilbao dominoi takimin por mysafirët arritën që ta ruajnë rezultatin.

Bilbao e filloi shumë furishëm këtë takim ku Asier Villalibre (3’) bëri tentimin e parë për shënim. Presioni i vendasve do të vazhdonte dhe ishte Mikel Vesga (9’) që goditi shtyllën me një goditje të fuqishme.

Berchiche (16’) ishte lojtari tjetër i Bilbao që rrezikoi dhe u rrëzua në zonë por gjyqtari nuk ndali penallti. Berenger (20’) mori një pas të mirë dhe doli ballë për ballë m          e Rajkovic, i cili bëri një pritje të mahnitshme për t’ia mohuar atij golin.

Villalibre (43’) dhe Munain (44’) por në të dy rastet përsëri në vend ishte portieri i Mallorcas që bëri pritje të mahnitshme për t’ia mohuar vendasve golat.

Pjesa e dytë prapë u nis furishëm nga Bilbao me Inaki Williams (48’) që rrezikoi për herë të parë portën e Mallorcas, por goditja e tij përfundoi jashtë shtyllës së majtë.

Mallorca rrezikoi për herë të parë në këtë takim me Pablo Maffeon (49’) që bëri një goditje të fuqishme e cila përfundoi jashtë shtyllës së djathtë të portës së Bilbaos.

Berchiche (56’) ishte lojtari tjetër i Bilbaos që rrezikoi brenda zonës por që goditja e tij ishte aq e dobët saqë përfundoi jashtë portës.

Kang Inn – Lee (66) i Mallorcas rrezikoi me një goditje me kokë por ishte Unai Simon që bëri një ndër pritjet më të mira në këtë ndeshje.

Guruzeta (82’) u harrua i pamarkuar në zonë nga Mallorca por ishte përsëri portier serb që ia mohoi një gol të bukur.

Muriqi do të dilte nga ndeshja në minutën e 86-të për t’u zëvendësuar Abdon Prats. Kosovari bëri një ndeshje të mirë në këtë ndeshje, ku përpos daljeve përpara disa herë ai ishte shumë i mirë edhe në detyra defansive, sidomos duke spastruar zonën nga ndërprerjet dhe goditjet standarde.

Nico Williams pati rastin më të mirë në minutën e dytë shtesë të ndeshjes për Bilbaon por përsëri priti portier serb.

Në fund erdhi të përfundimi i ndeshjes dhe Mallorca fitoi pikën e parë këtë sezon në një stadium tepër të vështirë siç është ai i skuadrës baske Athletic Bilbao.

Në ndeshjen e ardhshme të xhiros së dytë Bilbao luan kundër Valencias në shtëpi, kurse Mallorca do të këtë punë me Betisin në ishull.

(Kosova Sot Online)