Ibrahimovic kthehet nga lëndimi dhe paralajmëron formë "bombastike": Jam akoma Zoti, numri një në futboll

  • S.A /
  • 09 February 2023 - 14:43
Ibrahimovic kthehet nga lëndimi dhe paralajmëron formë

Zlatan Ibrahimovic është rikthyer pas një lëndimi që e mbajti për kohë të gjatë jashtë fushave të blerta. Sulmuesi suedez është i gatshëm për të premten, ku Milani përballet me Torinon në San Siro dhe ai pritet të jetë një ndihmesë e madhe për trajnerin Stefano Pioli, përcjell "Kosova Sot Online".

41-vjeçari si gjithmonë vjen me deklarata bombastike, duke thënë se është ende numri një dhe do të ndryshojë muzika me rikthimin e tij.

“Jam akoma Zoti, jam akoma numri një. Tani do të kthehem dhe do të ndryshojë muzika. Kam shumë dëshirë, dua të bëj shumë gjëra, ato që kam humbur në këto 7-8 muaj. Kam humbur kohë”, tha suedezi. Tutje Ibra foli edhe për krizën e Milanit, duke thënë se duhet të flasin pak dhe vlerat t’i tregojnë në fushë. “Nuk jam i shqetësuar për krizën, janë momente normale gjatë një kampionati. Tani duhet të flasim pak dhe të tregojmë në fushë vlerën tonë”, vazhdoi tutje Ibrahimovic.

Ibrahimovic foli edhe për kritikat për të, duke thënë se është mësuar tanimë me to pasi është numri një. “Kritikat janë normale, sepse nëse nuk të kritikojnë nuk je në majë. Mua më kritikojnë prej 25 vitesh ngaqë jam numri një, jam mësuar. Jam mirë, shumë mirë”. “Jam bashkuar me grupin dhe ndihem i lirë në fushë dhe jashtë. Kjo do të thotë që jam mirë. Gjatë kësaj periudhe kam bërë gjithçka për të ndihmuar trajnerin, stafin dhe klubin nga jashtë. Kisha durim sepse duhet të rikthehem në formën optimale, rikuperimi po shkon sipas planeve”, përfundoi suedezi.

(Kosova Sot Online )