Lukaku mund të rikthehet në Itali

“Telenovela” Romelu Lukaku nuk e ka ndërmend të mbarojë.

Sulmuesi belg nuk e di ende se ku do të luajë në sezonin e ardhshëm.

Chelsea nuk dëshiron ta mbajë gjigantin ofanziv pasi trajneri Mauricio Pochettino nuk llogarit në shërbimet e tij.

Ish-futbollisti i Evertonit dhe i Manchester Unitedit i prishi punët me Interin, ku u huazua dy herë, ndërsa në fund i dështoi edhe transferimi në Juventus.

Por, kjo nuk nënkupton se përfaqësuesi belg nuk do të rikthehet në Serie A.

Sipas mediave italiane, gjiganti i sulmit mund të përfundojë në Romë.

Trajneri Jose Mourinho e pëlqen futbollistin dhe do të donte ta ketë në dispozicion për sezonin e ri, që nisi së fundmi.

“La Gazzetta dello Sport” shkruan se shefja ekzekutive e “Giallorossi”, Lina Souloukou aktualisht gjendet në Londër me mision që të marrë informata rreth transferimit eventual të Lukakut në “Olimpico”.

E javë më parë flitej edhe për një interesim të Milanit për Romelu Lukakun, i cili do ta pëlqente një rikthim në kampionatin italian, ndërsa i ka refuzuar ofertat e majme nga klubet e Arabisë Saudite.

(Kosova Sot Online)