Kosova organizon për herë të parë 'FIBA 3×3 Europe Cup Qualifier 2024/25'
Për herë të parë në vendin tonë nga Federata e Basketbollit e Kosovës (FBK) do të organizohet FIBA 3×3 Europe Cup Qualifier 2024-2025.
Ky organizim i është besuar FBK-së nga FIBA dhe FIBA 3×3, ku të gjitha palët e përfshira së fundi kanë nënshkruar një kontratë dyvjeçare me mundësi vazhdimi edhe për dy vite të tjera (2026 – 2027).
FIBA 3×3 Europe Cup Qualifier është një garë zyrtare në nivel të kombëtareve në të cilën marrin pjesë ekipet nacionale nga Federatat anëtare kombëtare të FIBA-s. Formati i ngjarjes: Dy ditë (08/09 qershor 2024)/Dy konkurrencat (meshkuj/femra) në Prishtinë. Pritet të marrin pjesë 15 ekipe në të dyja konkurrencat (bazuar në dy vitet e kaluara që është organizuar në Qipro).
FIBA 3×3 Europe Cup Qualifier shërben si turne kualifikues për të siguruar një vend në FIBA 3×3 Europe Cup, pra fituesit e FIBA 3×3 Europe Cup Qualifier 2024 kualifikohen direkt në FIBA 3×3 Europe Cup të po njëjtit vit. Secili ekip (meshkuj/femra) përbëhet nga katër lojtarë – tre lojtarë aktivë në fushë dhe një zëvendësues.
FIBA 3×3 Europe Cup Qualifier ofron një shteg për ekipet kombëtare për të konkurruar në nivelin më të lartë të basketbollit evropian 3×3 dhe, për disa, një shans për t’u kualifikuar në Kupën e Botës FIBA 3×3, i cili është kulmi global i garës së basketbollit 3×3. Federata e Basketbollit e Kosovës në korrik të këtij viti për herë të parë ka qenë organizatore e një gare të basketbollit 3×3, ku bëhet fjalë për FIBA 3×3 U23 Nations League në të dyja konkurrencat (meshkuj/femra), ndërsa është bashkë-organizatore e FIBA 3×3 Women’s Series dhe FIBA 3×3 Challenger Prishtina që organizohet nga klubi 3×3 Prishtina.
“Jam jashtëzakonisht i lumtur që Federatës së Basketbollit të Kosovës i është besuar organizimi i FIBA 3×3 Europe Cup Qualifier. Privilegji për të organizuar këtë ngjarje prestigjioze ndërkombëtare të basketbollit është dëshmi e statusit në rritje të Kosovës në botën e sportit. Kjo garë paraqet një mundësi unike për Kosovën për të zhvilluar infrastrukturën e basketbollit dhe basketbollit 3×3, si dhe për të zhvilluar më tej sportin tonë të dashur. Ne besojmë se kjo ngjarje do të luajë një rol kyç në promovimin e basketbollit 3×3 dhe frymëzimin e brezit të ardhshëm të sportistëve në vendin tonë. Për më tepër, ndikimi ekonomik dhe social i organizimit të një ngjarjeje të tillë nuk mund të nënvlerësohet. Ne parashikojmë se me këtë rast do të kemi rritje të turizmit, mundësi punësimi dhe një nxitje për bizneset tona lokale, gjë që është thelbësore në këto kohë sfiduese. Dëshiroj të shpreh mirënjohjen tonë të përzemërt për partnerët tanë, sponsorët dhe autoritetet qeveritare, Ministrinë për Kulturë, Rini dhe Sport të Kosovës e Komunën e Prishtinës të cilët pritet të jenë bashkë-organizatorët tanë në realizimin e këtij eventi. Mbështetja e tyre është pamasë e çmueshme dhe ne jemi thellësisht mirënjohës për bashkëpunimin tonë.” – tha ndër të tjerash, Kryetari i Federatës të Basketbollit të Kosovës, Arben Fetahu.
(Kosova Sot Online)
