Llapi fiton ndaj Dukagjinit, Malisheva bindëse ndaj Fushë Kosovës
Kanë përfunduar dy ndeshjet e sotme të javës së 20-të në Superligën e Kosovës në futboll.
Llapi ka shënuar fitore 2:1 në shtëpi ndaj Dukagjinit, për t’u afruar me pikë me liderin, Ballkanin.
Ishte Muhamet Hyseni që kaloi vendasit në epërsi në minutën e nëntë nga penalltia.
Për këtë penallti, Besir Iseni u ndëshkua direkt me karton të kuq, për shkak të prekjes së topit me dorë në zonën e rreptësisë.
Muhamet Hyseni shënoi edhe njëherë tjetër në minutën e 58-të pas asistit të Arbnor Ramadanit.
Krejt në minutat shtesë, Dukagjini ngushtoi rezultatin në 2:1 nëpërmjet Victor Hugo që shënoi nga penalltia.
Me këtë fitore, Llapi tani shkon në 40 pikë në vendin e dytë, katër më pak se Ballkani që i prin renditjes tabelare.
Në anën tjetër, Dukagjini mbetet në vendin e gjashtë me 27 pikë gjithsej.
Fitore sot shënoi edhe Malisheva, që e mposhti në shtëpi Fushë Kosovën me rezultat bindës 4:1.
Kjo fitore, e ngjit Malishevën në vendin e katërt me 32 pikë, pesë më pak se Drita e vendit të tretë.
Kurse, Fushë Kosova mbetet e parafundit me 11 pikë të grumbulluara.
(Kosova Sot Online)