Argjentina fiton me spektakël miqësoren ndaj Guatemalës, shkëlqejnë Messi dhe Lautaro

  • S.A /
  • 15 June 2024 - 12:32
Argjentina fiton me spektakël miqësoren ndaj Guatemalës, shkëlqejnë Messi dhe Lautaro

Kombëtarja e Argjentinës ka fituar me lehtësi 4-1 ndaj Guatemalës në miqësoren përgatitore para nisjes së Copa America më vonë këtë muaj. Ekipi i Lionel Scalonit po tregon formë të lartë para nisjes së Copa America, pasi ka triumfuar pa shumë vështirësi ndaj Guatemalës në ndeshjen e zhvilluar në ‘FedEx Field’ të Marylandit, transmeton "Kosova Sot Online".

Pjesa e parë e ndeshjes u karakterizua me lojë më të mirë dhe me më shumë raste nga Argjentina, e cila shënoi edhe dy gola.

Megjithatë, goli i parë u shënua nga Guatemala, e cila kaloi në epërsi pas një autogoli të Lisandro Martinez (4’), por pastaj doli në skenë dyshja Lionel Messi-Lautaro Martinez.

Ylli i Inter Miamit shënoi fillimisht në minutën e 12-të për 1-1, ndërsa Lautaro në minutën e 39-të shënoi për epërsinë 2-1.

Në pjesën e dytë, Argjentina ishte dukshëm më e mirë, duke mbajtur ritmin, menaxhuar lojën dhe shënuar edhe dy gola tjerë.

Goli i tretë erdhi pas një asistimit të Messit për Lautaron (66’), i cili shënoi për epërsinë 3-1, ndërsa Messi shënoi në minutën e 77-të një gol të bukur për rezultatin përfundimtar 4-1.

(Kosova Sot Online )