Barcelona publikon listën e futbollistëve për Ligën e Kampionëve

UEFA ka publikuar listat e skuadrave për edicionin e ri të Ligës së Kampionëve dhe Barcelona ka bërë publike emrat e futbollistëve që do të përfaqësojnë klubin në këtë garë. Befasia më e madhe është përfshirja e talentit danez Roony Bardghji, i cili nuk arriti të regjistrohej në LaLigë si pjesë e ekipit të parë, por që tashmë ka të drejtë të luajë në kompeticionin më prestigjioz të kontinentit.

Gjithashtu, mes të regjistruarve gjendet edhe Marc-André ter Stegen. Edhe pse portieri gjerman është aktualisht i dëmtuar dhe do të mungojë në fillim të sezonit, Barcelona ka vendosur ta regjistrojë duke shpresuar se ai do të rikthehet deri në dhjetor dhe të jetë i gatshëm për ndeshjet vendimtare të fazës grupore dhe eliminatore.

Lista e dorëzuar përmban gjithsej 23 lojtarë në Listën A: tre portierë (Joan Garcia, Wojciech Szczesny dhe Marc-André ter Stegen), tetë mbrojtës (Jules Koundé, Eric Garcia, Pau Cubarsí, Ronald Araújo, Andreas Christensen, Gerard Martin dhe Casado), katër mesfushorë (Pedri, Frenkie de Jong, Gavi dhe Marc Bernal) dhe tetë sulmues (Dani Olmo, Fermín López, Lamine Yamal, Raphinha, Ferran Torres, Marcus Rashford, Robert Lewandowski dhe Roony Bardghji).

Në këtë listë nuk figurojnë disa nga talentet e La Masias si Guille Fernández, Toni Fernández, Dro, Jofre Torrents dhe Diego Kochen, edhe pse ata kanë qenë pjesë e grumbullimeve të para-skuadrës. Megjithatë, ata mund të shtohen në Listën B, e cila u jep mundësi lojtarëve të akademisë me të paktën dy vite në klub të regjistrohen deri 24 orë para çdo ndeshjeje.

Barcelona paraqitet kështu me një kombinim të përvojës së lojtarëve të mëdhenj si Lewandowski, De Jong e Koundé dhe entuziazmit të talenteve të rinj si Lamine Yamal, Cubarsí dhe Bardghji, një përzierje që Hansi Flick do të përpiqet ta shfrytëzojë në rrugën drejt suksesit evropian.

(Kosova Sot Online)