Anglia ka bërë një ndryshim të rëndësishëm

Anglia e nisi me fitore aventurën e saj në Kupën e Botës, duke mposhtur Kroacinë me rezultat 4-2, por gjatë ndeshjes shumica e tifozëve nuk vunë re një ndryshim të rëndësishëm në fanellat e “Tre Luanëve”.

Skuadra e drejtuar nga Thomas Tuchel e nisi ndeshjen në mënyrë ideale, me Harry Kane që realizoi nga pika e bardhë. Kroacia reagoi përmes Martin Baturina, por Kane riktheu avantazhin për anglezët me një gol me kokë pas një goditjeje nga këndi të ekzekutuar nga Declan Rice. Në fund të pjesës së parë, Petar Musa barazoi sërish rezultatin.

Pas pushimit, Anglia dominoi plotësisht takimin. Golat e Jude Bellingham dhe Marcus Rashford vulosën fitoren e merituar 4-2 në ndeshjen hapëse të Grupit L.

Megjithatë, përveç rezultatit, Anglia paraqiti edhe një version të përditësuar të fanellës së saj. Në ndeshjet përgatitore para Botërorit, numrat e lojtarëve ishin vendosur poshtë logos së Nike në anën e djathtë të gjoksit, gjë që kishte shkaktuar konfuzion te tifozët pasi fotografitë promocionale i shfaqnin në qendër të fanellës.

Për sfidën ndaj Kroacisë, federata angleze e riktheu vendosjen e numrave në pjesën qendrore të fanellës, ashtu siç ishte planifikuar fillimisht dhe siç përdoret edhe në fanellën e kuqe mysafire.

Anglia mund të luajë një ndeshje shtesë në Botëror

Ndërkohë, Anglia mund të bëhet kombëtarja e parë që zhvillon një ndeshje shtesë gjatë një Kampionati Botëror.

Sipas raportimeve, “Tre Luanët” janë në bisedime për një miqësore ndaj Sporting Kansas City mes ndeshjeve kundër Kroacisë dhe Ganës.

Trajneri Tuchel konfirmoi se ideja është t’u jepen minuta lojtarëve që kanë luajtur më pak gjatë turneut.

“Është e vërtetë që po përpiqemi të organizojmë një ndeshje të brendshme pas sfidës me Kroacinë. Kemi shumë ditë ndërmjet ndeshjeve dhe duam që lojtarët që nuk kanë luajtur shumë të marrin ngarkesë reale ndeshjeje. E bëmë këtë pas ndeshjes me Kosta Rikën dhe besoj se do ta bëjmë edhe një herë pas sfidës me Kroacinë”, deklaroi Tuchel.

(Kosova Sot Online)