Frank Lampard mund të jetë trajneri i ardhshëm i Anglisë

Frank Lampard mund të jetë trajneri i ardhshëm i Anglisë, sipas ish-kapitenit të “Tre Luanëve”, Terry Butcher, i cili beson se Federata Angleze duhet t’u japë më shumë mundësi trajnerëve vendas.

Lampard fiton mbështetje

Pas rikthimit të Coventry City në Premier League pas 25 vitesh mungesë, emri i Lampardit po përmendet gjithnjë e më shumë si një kandidat i mundshëm për stolin e kombëtares angleze në të ardhmen.

Butcher vlerësoi punën e ish-mesfushorit të Chelseat dhe tha se do të dëshironte ta shihte një ditë në krye të Anglisë.

“Do të doja shumë që Anglia të drejtohej nga një trajner anglez. Frank ka bërë një punë të shkëlqyer me Coventryn dhe shpresoj që një ditë ta marrë drejtimin e kombëtares”, deklaroi ai për GOAL.

Besim te Tuchel, por…

Butcher pranoi se nuk e kishte pritur që Anglia të drejtohej nga një trajner i huaj, por shtoi se Thomas Tuchel e ka fituar respektin me mënyrën si ka punuar.

“E mbështes Tuchelin dhe shpresoj të ketë sukses. Por në fund dua të shoh një trajner anglez në krye të kombëtares”, u shpreh ai.

Sipas tij, nëse Tuchel arrin të fitojë Kupën e Botës, Federata Angleze do ta ketë shumë të vështirë të mendojë për një ndryshim në stol.

Këshillë për Gerrard dhe Rooney

Butcher foli edhe për Steven Gerrard dhe Wayne Rooney, të cilët kanë kaluar periudha të vështira si trajnerë.

Ai theksoi se të dy duhet të vazhdojnë të mësojnë dhe të përshtaten me futbollin modern.

“Duhet të përshtatesh. Futbolli ka ndryshuar shumë nga koha kur ata luanin. Sa më shumë trajnerë anglezë të kenë sukses, aq më i madh do të jetë presioni mbi Federatën për të emëruar një anglez në të ardhmen”, tha ai.

Pak alternativa angleze

Butcher pranoi se aktualisht nuk ka shumë trajnerë anglezë të nivelit më të lartë në Premier League.

Ai përmendi Sean Dyche dhe Eddie Howe si disa nga emrat më të spikatur, duke shtuar se shpreson që në vitet e ardhshme të dalin më shumë trajnerë cilësorë nga sistemi i zhvillimit të trajnerëve në Angli.

Ndërkohë, Thomas Tuchel vazhdon misionin e tij në Kupën e Botës 2026, ku Anglia është kualifikuar në fazën e 1/16-ave dhe do të përballet me Republikën Demokratike të Kongos, ndërsa synon t’i japë fund pritjes 60-vjeçare për një trofe madhor.

(Kosova Sot Online)