O’Connell: Opozita e ka vendin në Kuvend

Ambasadori britanik në Kosovë Ruairí O’Connell ka shprehur shqetësimin e tij për zhvillimet e sotme në Kuvend.

Përmes një postimi në llogarinë e tij në Facebook, ai ka thënë se opozita e ka vendin në Kuvend, transmeton gazeta Kosova Sot Online.

 “Dhuna e vazhdueshme nuk do t’i zgjidhë problemet e Kosovës. Një Kuvend funksional është shtyllë kyçe për demokracinë. Vendi i opozitës është Kuvendi”, ka shkruar ai në Facebook.

O’Connell ka përmendur edhe deklaratën e djeshme të ambasadave të QUINT-it duke thënë se aty kanë vënë në pah disa gjëra.

“Fillimisht ne kemi kërkuar të gjitha palëve t’u kthehen dialogut. E vetmja mënyrë për të dalë nga kjo situatë është dialogu. Vendimi i presidentes për të referuar çështjen në Gjykatën Kushtetuese ka krijuar hapësirë për këtë dialog. Është vitale që të dy palët të shfrytëzojnë këtë kohë. Së dyti, kemi ritheksuar besimin tonë se Kosova ka nevojë për rregull dhe ligj. Unë besoj se të gjithë duhet të respektojnë ligjin, përfshirë të gjithë politikanët e të gjitha subjekteve politike. Ne kemi bërë të qartë se duhet të ndiqen të gjitha procedurat ligjore” ka shkruar ai.

O’Connell ka thënë se shpreson se të gjitha autoritetet në Kosovë do të sigurohen se do të respektohen liritë dhe të drejtat e njeriut.

Poashtu ka bërë të ditur se Britania e Madhe do të vazhdojë të vëzhgojë me kujdes të gjitha ngjarjet në Kosovë.

(Kosova Sot)