Lexoni edhe:
Kurdisja e prapaskenave politike nga Isa Mustafa, Koalicioni LDK-PDK opsion i vetëm për ta vazhduar kapjen e shtetit nga mafio politika
Përplasje kaotike në debatin e parë mes Trumpit dhe Bidenit: “A po e mbyll gojën, burrë?”
Presidenti i Shteteve të Bashkuara, Donald Trump, dhe kandidati demokrat për këtë post, Joe Biden, janë përplasur për disa çështje gjatë debatit të parë për zgjedhjet presidenciale të 3 nëntorit.
Kreu i Shtëpisë së Bardhë është mësuar të përplaset me gazetarët dhe ai e kaloi debatin e së martës duke e përdorur të njëjtën taktikë që e përdor në Shtëpinë e Bardhë – pengimin.
Gjatë debatit 90-minutësh, Trumpi vazhdimisht ua ndërpreu fjalën disa herë gazetarit Chris Wallace dhe rivalit politik, Joe Biden, duke i lënë nën hije përpjekjet për të diskutuar rreth politikave dhe duke nxitur reagime për shkeljen e rregullave për të cilat ishin pajtuar, përfshirë kohën e barabartë për të folur.
“Të lutem, lëre nënpresidentin të flasë”, iu drejtua Trumpit udhëheqësi i debatit gjatë njërit prej rasteve kur ndërhyri presidenti amerikan.
Ndërkohë rivali i tij, Joe Biden, në një rast presidentit amerikan iu drejtua: “A po e mbyll gojën, burrë?”
Trumpi e devijoi një pyetje kur iu kërkua t’i dënonte supremacistët e bardhë dhe grupet militante, duke i sulmuar aktivistët e krahut të majtë, shkruan Reuters.
“Trumpi nuk dëshiron të flasë për ato për të cilat ju keni nevojë – ju, populli amerikan. Kjo ka të bëjë me ju”, tha Joe Biden.
Përderisa Trumpi fliste, Bideni e tundte kokën, nganjëherë qeshte dhe kohë pas kohe ndalonte së foluri dhe rrinte i heshtur në shenjë acarimi.
I pyetur rreth taksave, Trumpi tha pa ndonjë dëshmi se ka paguar miliona dollarë dhe se kjo do të shihet, pavarësisht refuzimit për publikimin e kthimit të taksave që nga viti 2015.
(Kosova Sot Online)
