Hakmarrja ruse? Si e anuloi edhe Sergey Lavrovi, pas Putinit, vizitën në Beograd

  • E.K /
  • 29 tetor 2020 - 12:46
Hakmarrja ruse? Si e anuloi edhe Sergey Lavrovi, pas Putinit, vizitën në Beograd

Presidenti i Rusisë, Vladimir Putin, duket se po e bën atë që e di më së miri me lidershipin në Beograd. Ai po e zvarrit një vizitë që ua kishte premtuar serbëve muaj më parë. Aleksandar Vuçiqi e kishte paralajmëruar udhëtimin e mysafirit të lartë rus qysh në qershor, duke thënë se Putini do të shkojë në Beograd në muajin tetor. Në vend të Putinit, u tha se në Beograd do të zbarkojë kryediplomati rus, Sergey Lavrov, pikërisht në ditën kur u votua qeverie e re serbe, por edhe vizita e tij u anulua me arsyetimin se ai është i vetizoluar për shkak të kontakteve më një të infektuar me COVID-19. A po i hakmerren rusët për ngjarjen e 4 shtatorit Serbisë, kur Vuçiqi e Hoti nënshkruan marrëveshje me Trumpin në Shtëpinë e Bardhë?

Aleksandar Vuçiqi ka ndjekur një qasje prej servili në raport me Vladimir Putinin dhe Rusinë prej se është bërë adresa numër një e politikës serbe. Ky konformizëm i ka siguruar atij disa udhëtime në Rusi dhe vizita të Vladimir Putinit në Beograd. Presidenti serb me çdo kusht ka dashur që bashkëkombësve të tij t’ua çojë mesazhin se i ka dyert e hapura në Kremlin, duke u lavdëruar pothuajse në secilën paraqitje për dhjetëra takime me liderin rus. Por, ky mesazh i Vuçiqit nuk u është drejtuar vetëm serbëve dhe Rusisë. Autokrati serb mesazhin kryesor duket se ia ka destinuar pjesës tjetër të botës, duke dashur të thotë se është i aftë të bëjë politikë duke luajtur me disa karta dhe se Serbia duhet të merret seriozisht. Pra, mesazh për BE’në, ShBA’në e pse jo edhe për Kinën dhe Turqinë, me të cilat ka kultivuar raporte të ngushta, se ka afër vetes edhe partnerë tjerë.

Çedomir Antiq, historian serb, dëshirën e Vuçiqit për t’u dukur lider manovrues në ujërat e politikës ndërkombëtare e ka komentuar si një dëshirë të presidentit serb për ta kënaqur çarshinë në 40 anët e saj – se është për Evropë, për marrëveshje, për Serbinë e Madhe, për Jugosllavinë e Madhe, se është si Titoja, si Garashanini e si Pashiqi.

Vuçiqi është kujdesur që deklarativisht të tregojë se Serbia kultivon një marrëdhënie speciale me rusët. Por, çfarë ndodh në praktikë? Publikisht, ai flet me kënaqësi se Serbia nuk ka pranuar t’i vë sanksione Rusisë, të cilat i ka kërkuar BE-ja. Vuçiqi flet rusisht në takimet me rusët, ka thënë se do të jetë i pari që do ta marrë vaksinën ruse kundër COVID-19 posa të arrijë në Serbi. Po ashtu, Serbia është pjesëmarrëse e ushtrimeve ushtarake të përbashkëta me Rusinë dhe shpesh blen armë atje, përfshirë edhe aeroplanë. Vuçiqi e përsërit vazhdimisht atë që rusët duan ta dëgjojnë, se Serbia nuk do të bëhet asnjëherë pjesë e NATO’s, ndonëse kjo në Serbi më shumë ka lidhje me bombardimet e kryera nga aleanca në vitin 1999 për shkak të masakrave në Kosovë.

Në anën tjetër, Serbia ka refuzuar t’i japë status diplomatik personelit rus në bazën humanitare të vendosur në Nish, pavarësisht kërkesave të pandërprera ruse. Personeli i NATO’s në Serbi e ka këtë status.

Por, çfarë i acaroi kohëve të fundit marrëdhëniet dypalëshe?

Menjëherë pas marrëveshjes në Shtëpinë e Bardhë më 4 shtator, nga Moska erdhi një sulm i papritur. Zëdhënësja e Ministrisë së Jashtme ruse, Maria Zakharova, nëpërmjet pamjeve të filmit të njohur, “Basic Instict”, e akuzoi Vuçiqin se i hapi këmbët para amerikanëve, duke e pranuar marrëveshjen që ia ofroi Trumpi. Kjo nxiti një reagimn të ashpër, duke thënë se postimi i saj ishte vulgar dhe primitiv dhe se më së shumti flet për zëdhënësen dhe për ata që e kanë punësuar atë.

Pas kësaj, u tha se Putini i ka kërkuar falje Vuçiqit, gjë që, sipas medieve botërore, Putini e bën rrallë.

Nga ana e Beogradit, ky episod po tentohet të lihet në harresë. I fundit që ka tentuar të tregojë se marrëdhëniet rusoserbe nuk janë cenuar është Ambasadori serb në Moskë, Miroslav Lazanski, ish-komentator i çështjeve politiko-ushtarake, i cili në Beograd njihet për raportimet e tij për situatën në Kosovë në vitet e 90’a “për luftën e shtetit serb kundër terrorizmit në krahinë” dhe për inskenimet që bëheshin për ta arsyetuar brutalitetin e ushtrisë serbe në Kosovë.

Lazanski para dy ditësh në RTS ka thënë se për raportet Beograd-Moskë ka pasur komente keqdashëse, por që raportet mes dy vendeve janë shumë stabile dhe se dy vendet kanë miqësi dhe partneritet strategjik.

Lazanski tha se të mërkurën në Serbi shkon shefi i diplomacisë ruse, pikërisht në ditën kur do të votohej qeveria e re në Serbi, duke thënë se kjo megjithatë është një rastësi e jo ndonjë simbolikë.

Por, Lazanski u demantua në mbrëmje, kur u dha lajmi se Lavrovi nuk do të udhëtojë në Serbi për shkak se është në vetizolim për faktin se ka pasur kontakt me një person të infektuar me COVID-19. Pak a shumë, i njëjti arsyetim është bërë edhe për shtyrjen e vizitës së Putinit. Bashkëpunëtorët e tij kanë theksuar se shefi i shtetit rus nuk është duke udhëtuar askund në kohë pandemie. Putini është i njohur për strategjinë e tij për t’i lënë në pritje ata që duan ta takojnë. Këtë detaj e kishte zbuluar vetë Marko Gjuriqi, i cili do të shkojë në Uashington si ambasador, duke thënë se Vuçiqi e kishte pritur Putinin me orë për ta takuar, kur i kishte shkuar për vizitë.

(Kosova Sot Online)