Kjo është masa e paraburgimit ndaj dy personave që kryen vjedhje të rëndë në Malishevë

  • E.K /
  • 17 November 2020 - 14:25
Kjo është masa e paraburgimit ndaj dy personave që kryen vjedhje të rëndë në Malishevë

Gjykata Themelore në Gjilan u ka caktuar masën e paraburgimit prej 30 ditësh ndaj të pandehurve I. A. dhe E. H.

Ekziston dyshimi i bazuar se të pandehurit me datë 15.11.2020, pas mesnate, në fshatin Malishevë, me qëllim të përfitimit të kundërligjshëm pasuror për vete ose personin tjetër kanë kryer vjedhje të rëndë në shtëpinë e të dëmtuarit M. I., në atë mënyrë që me përdorimin e forcës me mjet të fortë kanë hapur dritaren dhe kanë depërtuar brenda, kanë demoluar dhomat e shtëpisë dhe kanë marrë një kasafortë të hekurit.

Kasafortën e kanë thyer, gjithashtu kanë marrë një armë AK47, një pushkë gjuetie “Altay Magnum”, një pushkë pumparic, një pushkë karabin RKS – 2019, pesëmbëdhjetë fishekë të kalibrit 12A dhe 33 fishekë të kalibrit 9 mm.

Me këto veprime, të pandehurit dyshohet se kanë kryer veprat penale në bashkëkryerje “vjedhje e rëndë”, “mbajtja në pronësi kontroll ose posedim të paautorizuar të armëve” dhe “importi, eksporti, furnizimi, transporti, prodhimi, këmbimi, ndërmjetësimi ose shitja e paautorizuar e armëve apo mjeteve plasëse”.

Gjyqtari i procedurës paraprake në Departamentin e Krimeve të Rënda, pas mbajtjes së seancës dëgjimore, ka konsideruar se janë përmbushur kushtet ligjore për caktimin e masës së paraburgimit ndaj të pandehurve, pasi që masat tjera alternative do të ishin të pamjaftueshme për zhvillimin me sukses të procedurës penale.

Palët kanë të drejtën e ankesës ndaj këtij vendimi në Gjykatën e Apelit.ë

(Kosova Sot Online)