Ky shtet shënon rekord të viktimave dhe rasteve me koronavirus

  • E.K /
  • 26 November 2020 - 12:23
Ky shtet shënon rekord të viktimave dhe rasteve me koronavirus

Rusia ka regjistruar shifra rekorde të të vdekurve dhe infeksioneve me koronavirus për herë të dytë brenda më pak se një jave.

Gjatë 24 orëve të kaluara, në këtë shtet u regjistruan 25.487 raste të reja, duke e çuar në mbi 2 milionë e 187 mijë shifrën e përgjithshme të të prekurve, shkruan The Guardian.

Përpos infektimeve, gjatë kësaj periudhe u shënuan edhe 524 të vdekur, që është shifra më e lartë prej fillimit të pandemisë. Numri i përgjithshëm i viktimave shkoi në 38.062.

Kjo ishte hera e dytë nga e shtuna që Rusia regjistroi rekord të rasteve dhe viktimave të koronavirusit për 24 orë.

Pavarësisht rritjes së rasteve, të cilat presidenti Putin javën e kaluar i përshkroi si alarmuese, Rusia nuk ka vendosur për izolim si në disa shtete evropiane.

Autoritetet në shumë rajone kanë kërkuar përdorim të maskave në vende publike dhe e kanë kufizuar numrin e punëtorëve në zyra, por nuk kanë marrë vendim për izolim të rreptë në shtëpi.

(Kosova Sot Online)