Bajram Çerkini u tregon deputetëve se çfarë i kishte premtuar Rugova në një takim pas luftës

  • E.K /
  • 09 dhjetor 2020 - 12:49
Bajram Çerkini u tregon deputetëve se çfarë i kishte premtuar Rugova në një takim pas luftës

Bajram Çerkini, kryetar i shoqatës “Zëri i Prindërve” ka folur sot në Kuvendin e Kosovës në një seancë të veçantë me rastin e ditës ndërkombëtare të përkujtimit dhe nderimit të viktimave të krimeve të gjenocidit.

Ndër tjerash, Çerkini foli edhe për një takim që e kishte pasur pas luftës me presidentin historik Ibrahim Rugova, dhe atë që ai i kishte premtuar për fatin e të pagjeturve nga lufta.

“Rahmetlia Ibrahim Rugova – kur kam qenë dy herë te ai – ai njëherë më ka thënë: Kur të bëhemi zot të vetvetes ta shpallim Kosovën Republikë dhe t’i kemi deputetët tanë që të flasin shlirë edhe me ndërkombëtarë, qatëherë ka me u zbardhë edhe fati i të pagjeturve”, tha Çerkini. “Kaloi goxha një kohë. Kaloi goxha një kohë që jeni në këto karriga”, shtoi ai, drejtuar deputetëve.

Ai kërkoi që institucionet e vendit të bëjnë më shumë për zbulimin e fatit të të pagjeturve dhe siç tha Çekrkini, të mos presin që Serbia do ta bëjë vetë këtë.

“Kjo do trysni të madhe prej miqve që na kanë çliru”, tha Çerkini. 

(Kosova Sot Online)