Ferizaj: Policia gjobiti 400 qytetarë dhe mbylli katër lokale për mosrespektim të masave anti - COVID-19

  • E.K /
  • 25 May 2021 - 10:25
Ferizaj: Policia gjobiti 400 qytetarë dhe mbylli katër lokale për mosrespektim të masave anti - COVID-19

Drejtoria Rajonale e Policisë së Kosovës në Ferizaj, në zbatim të vendimit të fundit të Qeverisë së RKS-së, për masat e përgjithshme dhe të veçanta për kontrollin, parandalimin dhe luftimin e Pandemisë COVID-19, nga data 17 deri më 23 maj ka realizuar disa aktivitete në këtë rajon.

Sipas një njoftimi për media, Policia në Ferizaj ka shqiptuar 400 gjoba për mosrespektim të bartjes së maskës, ndërsa për ata që nuk e kanë respektuar qarkullimin e lëvizjes janë gjobitur 20 qytetarë.

Siç thuhet tutje, Policia në Ferizaj ka mbyllur katër lokale për mosrespektim të masave antiCOVID-19.

“Gjoba për masat e përgjithshme dhe të veçanta, COVID-19: Mosrespektim i bartjes së maskës-400, mosrespektim i qarkullimit të lëvizjes-20, lokale për krijimin e kushteve dhe mbajtjen e distancës-1, lokale të kontrolluara-192, lokale të mbyllura-4. Këto masa, në masë të madhe po respektohen nga shumica e qytetarëve të cilët edhe i falënderojmë, por janë hasur edhe persona të cilët nuk i kanë përfillur të njëjtat”, thuhet në njoftim.

Ndërsa, sa i përket incidenteve të tjera në këtë rajon, në njoftim bëhet e ditur se: “Përmbledhje e incidenteve /rasteve me rëndësi dhe aksidenteve: Grabitje -1, vjedhje e rëndë-2, vjedhje-15, sulm ndaj personit zyrtar-1, aksidente në komunikacion rrugor 31, prej tyre : Me lëndime-9, persona të lënduar-13, me dëme materiale-23, gjoba në komunikacion-451, heqje e patentë shoferit ( konfiskim)-16”.

Ndryshe, Drejtoria Rajonale e Policisë në Ferizaj, do të vazhdojë me aktivitete të tilla edhe në ditët në vijim, në parandalim dhe respektim të masave sipas vendimit të Qeverisë së Republikës së Kosovës dhe Ligjit 07/L-006 për Parandalimin dhe Luftimin e Pandemisë COVID-19, gjithashtu do të vazhdojë me masa të shtuara në parandalim të incidenteve dhe aksidenteve në komunikacionin rrugor.

(Kosova Sot Online)