Lexoni edhe:
Asnjë i vdekur, 9 raste të reja me Covid-19 në Kosovë
Pse Kosova nuk është në listën e udhëtimeve “free Covid” të BE-së? Ministri Vitia shpreh shqetësim
Ministri i Shëndetësisë, Arben Vitia ka shprehur shqetësimin se pse Kosova nuk është pjesë e listës së udhëtimeve “free Covid”, të Bashkimit Evropian.
Gjatë një takimi me udhëheqësin e Zyrës së Bashkimit Evropian në Kosovë, Tomáš Szunyog, Vitia tha se Kosova aktualisht e ka shkallën e ulët të pozitivitetit të rasteve me koronavirus, nën 1%.
Për këtë, ai nga Szunyog ka kërkuar edhe trajtimin e barabartë nga BE-ja për të gjitha shtetet e rajonit përfshirë edhe Kosovën.
Bashkimi Evropian sot zyrtarisht ka lejuar udhëtimin e qytetarëve nga Shqipëria, Maqedonia dhe Serbia drejt vendeve të BE-së. Këto tri shtete fqinje janë vënë në listën e udhëtimeve “free Covid”, nga BE-ja.
Njoftimi i plotë:
Ministri i Shëndetësisë z. Arben Vitia sot priti në takim udhëheqësin e Zyrës së Bashkimit Evropian në Kosovë, z. Tomáš Szunyog.
Në këtë takim Ministri Vitia njoftoj z. Szunyog për situatën epidemiologjike në vendin tonë, procesin e vaksinimit masiv, dhe e informoj rreth përgatitjeve sipas Planit Shtetëror të Vaksinimit.
Me theks të vecantë Ministri Vitia përmendi indikatorët kryesor të gjendjes epidemiologjike si tregues kryesor të cilët janë: Rënia e dukshme e rasteve të vdekjes dhe e hospitalizimeve, numrin e ulët të rasteve, shkallën e ulët të pozitivitetit nën 1% dhe indikatorë të tjerë që e tregojnë situatën epidemiologjike si shumë të mirë dhe stabile për momentin. Ministri Vitia gjithashtu shprehu shqetësimin se përkundër kësaj, Republika e Kosovës nuk është në listën e udhëtimeve “Free COVID” të BE-së, pavarësisht situatës shumë të mirë epidemiologjike. Trajtimi do duhej të jetë i barabartë për të gjitha shtetet e rajonit sidomos kur janë indikatorë të matshëm dhe të cilat Republika e Kosovës i ka përmbushur.
Në anën tjetër, z. Szunyog u shpreh i lumtur për përmirësimin e situatës epidemiologjike dhe së bashku me Ministrin Vitia u dakorduan për të vazhduar tutje bashkëpunimin mes Bashkimit Evropian dhe Republikës së Kosovës në përmirësimin dhe përforcimin e sistemit shëndetësor në Kosovë.
(Kosova Sot Online)
