Ministrja Gërvalla takon ministrin e Jashtëm të Luksemburgut

  • E.K /
  • 30 June 2021 - 12:01
 Ministrja Gërvalla takon ministrin e Jashtëm të Luksemburgut

Ministrja e Punëve të Jashtme dhe Diasporës e Republikës së Kosovës, Donika Gërvalla, në kuadër të vizitës së saj në Luksemburg ka takuar Ministrin e Punëve të Jashtme dhe Evropiane të Luksemburgut, Jean Asselborn.

Gjatë darkës së punës, të shtruar nga kryediplomati i Luksemburgut, homologët biseduan rreth një game të gjerë temash bilaterale por edhe çështje evropiane, njofton MPJD.

Pas takimit, Ministrja Gërvalla deklaroi se është mirënjohëse për mbështetjen e vazhdueshme të Luksemburgut për Kosovën në rrugën e saj drejt integrimit evropian.

“Luksemburgu vazhdon të mbështesë udhëtimin pa viza për të gjithë qytetarët e Kosovës në zonën Shengen. Luksemburgu qartazi e konsideron marrëdhënien me Kosovën si një partneritet të vërtetë”, ka thënë ajo.

Ministrat diskutuan në detaje për shumë fusha të bashkëpunimit siç janë: bashkëpunimi i ngushtë ekonomik, sferat e arsimit, shëndetësisë, sigurisë, kulturës si dhe perspektivën evropian sidomos të të rinjve. Ministrja Gërvalla tërhoqi vëmendjen rreth zhvillimeve në rajon dhe sfidave të lidhura me këto procese. 

Ministrja Gërvalla falënderoi homologun e saj gjithashtu për mbështetjen e Luksemburgut gjatë pandemisë. 

Në fund ministrja Gërvalla ftoi ministrin Asselborn për të vizituar Kosovën, ftesë të cilën ai e pranoi me kënaqësi.​

(Kosova Sot Online)