Vetëvendosje i shpall zgjedhjet e brendshme për kandidatë për kryetarë të komunave

  • E.K /
  • 01 July 2021 - 11:07
 Vetëvendosje i shpall zgjedhjet e brendshme për kandidatë për kryetarë të komunave

Lëvizja Vetëvendosje ka bërë të ditur se i ka shpallur zgjedhjet e brendshme për kandidatët për kryetar të komunave për zgjedhjet lokale të 17 tetorit.

Kështu kanë bërë të ditur nga LVV-ja përmes një komunikate për media.

“Shpallen zgjedhjet e brendshme për kandidatët për kryetarë komunash për zgjedhjet lokale të 17 tetorit 2021  Në kuadër të zgjedhjeve të brendshme dhe në përputhje me Statutin dhe Rregulloren e Zgjedhjeve të Brendshme, Lëvizja VETËVENDOSJE!, nga sot shpallë zgjedhjet e brendshme për kandidatët për kryetarë komunash”, kanë thënë nga LVV-ja.

Në partinë e Albin Kurtit thonë se për të kandiduar si kryetar të komunave mund të aplikojnë të gjithë të interesuarit deri me datën 3 korrik, në ora 17:00.

“Komisioni Zgjedhor i Përgjithshëm (KZP) njofton të gjithë aktivistët e Lëvizjes VETËVENDOSJE!, të cilët janë të interesuar për të kandiduar për pozicionin e kandidatit për Kryetar të Komunës nga Lëvizja VETËVENDOSJE!, që të paraqesin deklaratën e kandidaturës nga data 1 korrik deri më 3 korrik 2021, ora 17:00.  Pas dorëzimit të dokumentacionit të nevojshëm, Komisioni Zgjedhor Ad Hoc i Qendrës (KZAQ) dhe  KZP do të bëjnë verifikimin e tyre dhe do ta pajisë kandidatin/en me formularin e grumbullimit të nënshkrimeve të nevojshme për zyrtarizimin e kandidaturës, ashtu siç është e paraparë me Statutin dhe Rregulloren e zgjedhjeve të brendshme të Lëvizjes VETËVENDOSJE!”, thonë nga ky subjekt.

“Lëvizja VETËVENDOSJE! është subjekti më demokratik e më transparent sa i përket vendimmarrjes, veprimtarisë e organizimit.  Në frymën e demokracisë së brendshme ne urojmë për një proces zgjedhor sa më të mirë dhe ftojmë për përfshirje sa më të madhe rreth këtij procesi.  Ky proces zgjedhor i brendshëm do t’i paraprijë mobilizimit e përgatitjeve për të mundësuar që ndryshimi i madh i 14 shkurtit të shtrihet edhe nëpër komuna. Referendumi i 14 shkurtit do të kompletohet më 17 tetor, kurse ndryshimi i gjithmbarshëm do të jetë edhe më i shpejtë edhe më i thellë pas 17 tetorit”, thuhet në njoftim.

(Kosova Sot Online)