Von der Leyen godet Orbanin: Turp, duhet ta largoni ligjin anti-LGBT

  • G.G /
  • 07 July 2021 - 11:22
Von der Leyen godet Orbanin: Turp, duhet ta largoni ligjin anti-LGBT

Presidentja e Komisionit Evropian, Ursula von der Leyen, paralajmëroi të mërkurën se Hungaria duhet ta shfuqizojë legjislacionin që ua ndalon shkollave përdorimin e materialeve që cilësohen si promovim i homoseksualitetit ose do të përballet me forcën e plotë të ligjit të BE-së.

Legjislacioni i ri hungarez u kritikua ashpër nga udhëheqësit e BE-së në një samit muajin e kaluar. Kryeministri i Holandës ishte më i rrepti, duke thënë se Hungaria duhet t’i respektojë vlerat e tolerancës së Bashkimit Evropian ose të largohet nga blloku.

“Homoseksualiteti barazohet me pornografinë. Ky legjislacion e përdor mbrojtjen e fëmijëve për t’i diskriminuar njerëzit për shkak të orientimit të tyre seksual. Ky është turp”, deklaroi presidentja e Komisionit Evropian në Parlamentin Evropian në Strasburg.

“Asnjë çështje nuk ishte më e rëndësishme se ajo që i cenon vlerat tona dhe identitetin tonë”, tha Von Der Leyen për ligjin hungarez, për të cilin shtoi se bie në kundërshtim me mbrojtjen e pakicave dhe respektimin e të drejtave të njeriut.

Zyrtarja e lartë gjithashtu tha se Hungaria do të përballet me forcën e plotë të ligjit të BE-së, nëse nuk zmbrapset, ndonëse nuk dha hollësi për ndonjë masë konkrete. Ligjvënësit evropianë thonë se në këta hapa mund të përfshihen ngrirja e fondeve të BE-së për Budapestin dhe një vendim i Gjykatës Evropiane të Drejtësisë.

(Kosova Sot Online)