Pamje nga Kina: Qytete të tëra nën ujë dhe njerëz që luftojnë nëpër përrenj për të shpëtuar

Kina qëndrore është goditur nga reshje të mëdha shiu dhe përmbytje nga ajo që meteorologët i cilësojnë si shirat më të rëndë në një mijë vitet e fundit.

Në Zhengzhou, një qytet me më shumë se 12 milionë njerëz të vendosur në brigjet e Lumit të Verdhë, 12 persona vdiqën në një përmbytje të metrosë, ndërsa më shumë se 500 të tjerë u shpëtuan, thanë autoritetet atje.

Video, e postuar në mediat sociale të martën, tregon njerëz që qëndrojnë në errësirë, ndërsa stacioni nëntokësor duket si një pishinë e madhe që vërtitet.

Rreth 100,000 njerëz janë evakuuar deri më tani.

Miliona njerëz në Zhengzhou janë prekur nga efektet e stuhisë, e cila ka nisur që nga fundjava, pasi zona e provincës Henan u prek nga përmbytjet e lumenjve përreth që dolën jashtë shtatit për shkak të sezonit jashtëzakonisht aktiv të shiut.

Linjat e shumta hekurudhore në të gjithë provincën Henan, e cila është nyja kryesore e Kinës qendrore, janë pezulluar. Një numër i madh i autostradave gjithashtu janë mbyllur dhe fluturimet janë anuluar ose janë vonuar.

Rrugët janë përmbytur në një duzinë qytetesh të populluara dendur. Pamjet e postuara në mediat sociale tregojnë banorët e zonës të kapur për dore, duke sfiduar rrugët e përmbytura. Një nga pamjet tregon ujërat poshtë një rruge kryesore, që kanë ‘varrosur’ vetura.

Në dhjetëra liqene artificiale, uji ka tejkaluar të gjitha nivelet e lejueshme.

Sipas parashikimeve, reshjet e dendura të shiut do të zgjasin ende.

(Kosova Sot Online)