Prokuroria flet për vrasjen e zyrtarëve të PDK’së: Hetimet po zhvillohen në disa pista

  • E.K /
  • 09 September 2021 - 12:38
 Prokuroria flet për vrasjen e zyrtarëve të PDK’së: Hetimet po zhvillohen në disa pista

Zëdhënësi i Prokurorisë Themelorë të Pejës, Shkodran Nikçi, është deklaruar lidhur me vrasjen e dy zyrtarëve të Partisë Demokratike të Kosovës. Ai tha se hetimet janë duke u zhvilluar në disa pista, ndërsa trupat e pajetë janë dërguar për obduksion.

Nikçi tha se derisa të vazhdojnë hetimet janë të rezervuar në dhënien e informatave pasi rasti është i ndjeshëm dhe mund të dëmtohet procesi i hetimeve.

“Të mërkurën mbrëma si pasojë e të shtënave me armë dy persona kanë vdekur dhe një është plagosur. Vendit të ngjarjes i janë përgjigjur njësitet policore dhe prokurorja e Departamentit të krimeve të rënda.  Sot gjatë ditës kryeprokurori, prokurorja dhe hetuesit policor kanë dalë në vendin e ngjarjes dhe në mënyrë intensive po zhvillohen hetimet që të zbulohen rrethanat dhe motivet”, ka deklaruar Nikçi.

Nikçi ka treguar janë sekuestruar dy armë, derisa ka thënë se trupat e viktimave janë dërguar për obduksion në Institutin e Mjekësisë Ligjore.

“….Në disa pista janë duke u zhvilluar hetimet dhe pasi hetimet të përfundojnë do të dalim me njoftim zyrtar. Derisa të vazhdojnë hetimet duhet të jemi të rezervuar pasi është rast i ndjeshëm dhe mund të dëmtohen hetimet”, tha Nikçi..

Mbrëmë kanë mbetur të vrarë kandidati i PDK-së për kryetar të Pejës, Astrit Ademaj dhe zyrtari i po kësaj partie, Blerand Kadrijaj. 

(Kosova Sot Online)