Lexoni edhe:
Presidentja Osmani betohet për sundimin e ligjit, me reformën në drejtësi dhe ligjin Vetting, korrupsioni i përket të shkuarës!
Zyra e Auditimit: Financat e Qeverisë së Gjermanisë janë në gjendje kritike
Financat e Qeverisë Federale të Gjermanisë janë në gjendje kritike dhe qeveria e ardhshme duhet t’i konsolidoj ato, tha të mërkurën Zyra Federale e Auditimit. Ky mund të jetë paralajmërim për partitë që po punojnë për koalicionin e ri, sepse ato po e shqyrtojnë rritjen e borxhit.
SPD-ja, Të Gjelbrit dhe Demokratët e Lirë përballen me problemin e shpenzimit masiv, pasi janë pajtuar gjatë bisedimeve që të kthehen në kufijtë e rreptë të borxhit nga viti 2023 dhe të shmanget rritja e taksave.
Burimet e afërta me bisedimet e palëve i thanë agjencisë “Reuters” javën e kaluar se ato po diskutojnë për hua më të madhe federale vitin e ardhshëm për ta mundësuar financimin e një fondi qeveritar shumëmiliardësh për investimet në mbrojtjen e klimës, transmeton Gazeta Express.
Megjithatë, Zyra Federale e Auditimit, në një raport për dhomën e ulët të kuvendit, paralajmëroi kundër zgjerimeve fiskale.
“Situata është serioze. Për t’i bërë financat federale të qëndrueshme përsëri, qeveria e re federale duhet të veprojë tani. Financat federale janë në një gjendje kritike. Pritja dhe shpresa për kohë më të mira ekonomike nuk do të mjaftojë për kthimin e qëndrueshmërisë financiare”, tha kjo zyrë.
Këshilltarët ekonomikë të qeverisë gjermane, parashikimet e të cilëve e udhëzojnë ekzekutivin për përcaktimin e politikave fiskale, e ulën parashikimin për rritje gjatë vitit 2021, nga 3.1 për qind, sa kishin vlerësuar në mars, në 2.7 për qind.
(Kosova Sot Online)
