Lexoni edhe:
Mblodhi 50 mijë euro donacion duke u shtirur si e sëmurë me kancer, 42-vjeçarja ‘i la të gjitha’ paratë në bixhoz
Tahiri thotë se Ligji i Pagave duhet të rregullohet e jo të bie, jep edhe disa propozime si të domosdoshme
Shefi i Grupit Parlamentar të Aleancës për Ardhmërinë e Kosovës, Besnik Tahiri, ka deklaruar se zhvendosja e debatit për Ligjin e Pagave në media, pa ndodhur dialogu i mirëfilltë me partnerët institucionalë dhe me Kuvendin, e minon këtë proces që nisje.
“Zhvendosja e debatit për Ligjin e Pagave në media pa ndodhur dialogu i mirëfilltë me partnerët institucionalë dhe me Kuvendin e minon procesin që në nisje. Mos reflektimi në aktgjykimin e Gjykatës Kushtetuese për Institucionet e Pavarura Kushtetuese, është tendencë e qartë për ta dështuar ligjin. Madje, edhe vetë shtojca 8, paga e drejtuesit të lartë në ministri, është më e madhe se në Agjencitë e Pavarura Rregulluese”, ka shkruar Tahiri.
Sipas Tahirit, në Ligjin e Pagave duhet të ketë kujdes të shtuar te shtojca e arsimit, shëndetësisë dhe policisë.
“Në veçanti, akomodimi i nivelit politik dhe problemet tek shtojca e arsimit, shëndetësisë dhe policisë duhet pasur kujdes dhe reflektuar seriozisht. Është e rëndësishme që parashikueshmëria e pagës, të mos rrezikohet në procesin e amandamentimit, çështje që asokohe është hequr gjatë dy leximeve, përkundër insistimit tim dhe qeverisë. Duke qenë se ky proces konsolidon themelet e pagesës për administratën shtetërore, por edhe mishërimit me këtë çështje, kemi gjithë përkushtimin për të kontribuar që ky ligj të dalë në dritë”, ka shkruar Tahiri.
Tahiri ka propozuar disa pika të cilat thotë se duhet të jenë të domosdoshme në Ligjin e Pagave.
“Si kontribut të parë dhe rekomandime, vlerësoj të domosdoshme: – Të rritet vlera e koeficientit; Procesi të komunikohet qartë që të mos krijohen paqartësi dhe rritje të hendekut me përfaqësuesit sindikalë; Palët të nisin dialogun serioz mbi parimet e qarta që rregullojnë procesin; Problemet e identifikuara nga aktgjykimi i Gjykatës Kushtetuese të reflektohen në tërësi; Të reflektohen pikëpamjet e shoqërisë civile dhe partnerëve ndërkombëtarë: BE, SIGMA, Banka Botërore dhe profesionistëve të çmueshëm në administratë; Të diskutohet me opozitën për t’i informuar mbi procesin dhe zgjerimin e konsensusit mbi një proces vital sikurse ky i Ligjit të Pagave”, ka shkruar Tahiri në Facebook.
Ndryshe, të martën është raportuar se Ministria e Punëve të Brendshme ka hatuar draftin final të Ligjit të Pagave, për pagat e zyrtarëve publikë, ku përfshihen pagat për presidentin, kryeministrin e deri te rekruti i FSK-së.
Por, disa orë më vonë, këtë lajm e ka mohuar ministri i Brendshëm, Xhelal Sveçla.
Sveçla ka shkruar se raportimet për rritje pagash me Ligjin e ri për zyrtarët e institucioneve s’janë të vërteta.
“Ministria e Punëve të Brendshme dëshiron të informojë qytetarët se vala e pseudolajmeve që po përhapen me shpejtësi në mediat tona rreth ligjit për pagat e zyrtarëve publik është e pavërtetë dhe qëllimkeqe. As nuk ka draft final të ligjit për pagat e zyrtarëve publik e as nuk ka ndonjë vlerë të koeficientit. Vlera e koeficientit nuk do të jetë pjesë e ligjit për pagat e zyrtarëve publik, meqë e njejta përcaktohet me ligjin e buxhetit. Kjo valë e dezinformatave ka për qëllim krijimin e konfuzionit dhe krijimin artificial të pritjeve me idenë se këto pritje pastaj shumë lehtë mund të keqpërdoren për nxitje të pakënaqësive dhe ngritje të debateve të kota krahasuese”, ka shkruar ai.
Tutje ministri Sveçla tha se ministria që drejton do ta ndajë me publikun një draft final kurdo që ai finalizohet.
“Ju bëjmë me dije që ministria jonë do të ndajë draftin final me publikun në momentin kur i njëjti të finalizohet”, ka thënë Sveçla.
(Kosova Sot Online)
