Lexoni edhe:
Një i vrarë dhe gjashtë të plagosur nga bombardimet që goditën një ndërtesë banimi në Kyiv
Përfundon aksioni “Pika”, raportet e para thonë se në terren u arrestuan rreth 50 policë – përfshirë dy udhëheqësit e pikave kufitare
Ka përfunduar aksioni i koduar “Pika”, cak i të cilit ishin zyrtarët e kufirit në Rajonin e Gjakovës dhe Prizrenit. Burime brenda Prokurorisë Speciale të Kosovës thanë se numri i të arrestuarve është rreth 50, në mesin e tyre dy udhëheqësit e pikave kufitare Qafë Prush dhe Qafë Morinë si dhe dy oficerë doganorë, të tjerët janë policë kufitar.
Aksioni ka nisur mëngjesin e sotëm, i paraprirë nga një hetim rreth 1-vjeçar duke përfshirë masa të fshehta të hetimit. Sipas IPK-së, “Pika” është përkrahur edhe nga Agjencia e Kosovës për Inteligjencë, Dogana e Kosovës dhe Policia e Kosovës.
Zyrtarët e arrestuar dyshohen për përfshirje në aktivitete të kundërligjshme që lidhen me veprat penale: “marrje e ryshfetit” dhe “keqpërdorim i të një numri të zyrtarëve pozitës apo autoritetit zyrtar”.
Express raportoi se në Qafë Morinë u arrestuan gjithë policët që ishin në ndërrim, më pas të njëjtit u zëvendësuan nga policë të pikave të tjera kufitare, për të mbuluar mungesën e tyre.
Për aksionin ka lëshuar komunikatë edhe Dogana e Kosovës, pasi në pranga u vunë edhe dy oficerë doganorë nën dyshimet se kanë kryer veprat penale ‘mitmarrje’ dhe ‘shpërdorimi i detyrës apo autoritetit zyrtar’.
“Drejtori i Përgjithshëm i Doganës ka ndërmarrë veprimin e suspendimit të menjëhershëm të zyrtarve doganor të arrestuar dhe do të filloj procedimin administrativ disiplinor” njoftoi Dogana.
Pas përfundimit të aksionit, Prokurori i Shtetit njoftoi për organizimin e një konferencë të jashtëzakonshme. Konferenca do të mbahet nga ora 15:00.
“Pjesëmarrës në këtë konferencë do të jenë përfaqësues nga Prokurori i Shtetit, Inspektorati Policor i Kosovës dhe Policia e Kosovës”, thuhet në njoftimin dërguar mediave.
Media publikoi momentin kur policët e arrestuar u sollën në objektin e Inspektoratit Policor të Kosovës.
Lidhur me këtë aksion ka reaguar edhe ministri i Punëve të Brendshme, Xhelal Sveçla, ku ndër të tjera ka thënë se Policia e Kosovës nuk do të jetë vendi ku thyhet ligji e bëhet korrupsioni.
(Kosova Sot Online)
