33-vjeçari që vdiq pas aksidentit të autoambulancës ishte djalë hasreti, babai i tij bën postimin prekës

Skofiar Gjini, 33-vjeçar, ka mbetur i vdekur pas një aksidenti që ndodhi mes një veture dhe një autoambulance dje në Gjakovë.

Babai i tij, Gëzim Gjini, ka bërë një postim prekës për të, derisa ka njoftuar edhe për varrimin.

“Pse na ike kështu, pse i la Babë e Nonë, Grua dhe dy Vajza!? Përfundoj jeta për Ty por edhe për Ne si Prindër! Shkove në orar pune të shpëtosh jetë, e humbe jetën tënde! Këtë shkaktar vdekjeje, lë ta dënoj Ligji ose do ta dënoj Kanuni! Skofiar të emërova me emër, Skofiar ishe në jetë!”, ka shkruar Gjini.

Lexoni edhe:

Osmani: Ndërkombëtarët s’mund të na kërkojnë ta zbatojmë vendimin për Manastirin e jo atë të Asociacionit

Ai ka njoftuar se varrimi do të bëhet sot në orën 19:00, në varrezat e reja në Gjakovë.

33-vjeçari ishte punonjës i Qendrës Kryesore të Mjekësisë Familjare në Gjakovë.

Ndryshe, për rastin ka njoftuar edhe sot Policia, përmes raportit 24 orësh.

“Rr. Pashko Vasa, Gjakovë 30.06.2022 – 05:50. Është arrestuar i dyshuari mashkull kosovar për shkak se derisa kishte qenë duke e drejtuar veturën, nga pakujdesia ka shkaktuar aksident me një autoambulancë e cila ka qenë duke i transportuar disa persona të lënduar nga një vetaksident. Si pasojë e aksidentit pesë persona të gjithë meshkuj kosovarë kanë pësuar lëndime trupore për të cilat kanë pranuar tretman mjekësor, ndërsa njëri nga të lënduarit ka ndërruar jetë, me vendim të prokurorit trupi i pajetë është dërguar në IML për obduksion, kurse i dyshuari që ka shkaktuar aksidentin me vendim të prokurorit, është dërguar në mbajtje”, thuhet në raport.

(Kosova Sot Online)