Lexoni edhe:
I sëmurë dhe në ‘të zezë’ në Gjermani, kosovari s’guxon të shkojë te mjeku se e kthejnë në Kosovë
Sa paguhet një profesor universitar në Kosovë e sa në Shqipëri? Shifrat do t’ju befasojnë
Pedagogu në Fakultetin e Inxhinierisë Matematike në Shqipëri, Sandër Kovaçi, thotë se paga e profesorëve në universitetet e Kosovës shkon deri në 1500 euro, ndërsa në Shqipëri nuk e kalon shifrën e 1000 eurove.
Në një intervistë për “Euronews Albania”, Kovaçi u shpreh se pedagogët e Shqipërisë kërkojnë rritjen e pagave me 30% këtë vit dhe 20% vitin e ardhshëm.
“Ne e kemi kërkuar takimin me ministrinë apo me institucionet që herët, tani kohët e fundit ka tentativa për komunikim, por nuk ka asgjë konkrete sa i përket realizimit të sindikatës. Është kërkuar rritja që t’i afrohet nivelit të pagës të Universitetit të Kosovës të para dy vjetësh. Të rritet në masën 30% këtë vit dhe 20% vitin e ardhshëm. Është një diferencë 50% më e ulët. Atje paga e një profesori shkon 1400-1500 euro, ndërsa këtu profesori nuk paguhet as 1 mijë euro”, theksoi ai.
Stafet akademike dhe administrative të universiteteve në Shqipëri do te zhvillojnë sot një protestë 1-orëshe.
Kjo protestë do të jetë si paralajmërim ndaj Qeverisë, e cila nuk ka patur asnjë reagim lidhur me peticionin e tyre për rritjen e pagave, por edhe mbështetje më të madhe për kërkimin shkencor.
Protesta do të zhvillohet në Fakultetin e Shkencave të Natyrës, në orën 10:00. Pedagogët paralajmërojnë mosnisje të procesit mësimor më 17 tetor nëse Qeveria nuk do të marrë masa për të plotësuar kërkesat e tyre.
(Kosova Sot Online)
