Lexoni edhe:
Qeveria me transparencë të kufizuar për detajet e dialogut me Serbinë që është duke i zhvilluar
Kryeministri i Kosovës, Albin Kurti, pret sot në takim të dërguarin e posaçëm të ShBA-së për Ballkanin Perëndimor, Gabriel Escobar.
Takimi pritet të ndodhë në orën 9:50, sipas njoftimit nga kryeministria.
Paraprakisht, Gabriel Escobar do të pritet nga presidentja Vjosa Osmani, me fillim të orës 8:30, dhe ndërkohë gjatë ditës, ai do të takohet edhe me krerët e opozitës.
Përveç liderëve institucionalë, Escobar do të takohet edhe me përfaqësuesit e partive opozitare.
Detaje të tjera për këtë vizitë nuk janë dhënë, megjithëse është hera e dytë brenda disa javësh, që amerikani Escobar takon partitë opozitare.
Herën e kaluar në Kosovë, Escobar ka qenë së bashku me evropianin Miroslav Lajçak. E ky i fundit javën e kaluar ka qëndruar në Prishtinë, ndërsa dje ka vizituar Beogradin. Në dy takimet me kryeministrin Albin Kurti dhe presidentin serb, Aleksander Vuçiq, Lajçak ka thënë se temë boshte e diskutimit kanë qenë targat dhe energjia.
Ndryshe, javëve të fundit janë intensifikuar përpjekjet e liderëve botëror sa i përket bisedimeve Kosovë –Serbi.
I fundit ishte sekretari amerikan i Shtetit, Antony Blinken, i cili bisedoi përmes telefonit me kryeministrin Kurti dhe me presidentin Vuçiq. E në këtë proces janë angazhuar edhe kancelari gjerman, Olaf Scholz dhe presidenti francez, Emmanuel Macron, të cilët kanë dhënë një propozim për marrëveshjen dypalëshe.
(Kosova Sot Online)