Tahiri: Vetëvendosje nuk ia dinë vlerën marrëveshjes me njohje reciproke me Serbinë

Lëvizja Vetëvendosje e Albin Kurtit ”nuk ia dinë vlerën marrëveshjes me njohje reciproke me Serbinë sepse nuk ka ekzistuar në kohën e çlirimit dhe pavarësisë së Kosovës“, ka deklaruar ish-kryenegociatorja e Kosovës në dialogun Kosovë-Serbi, Edita Tahiri, transmeton gazeta “Kosova Sot Online”.

Sipas saj, vlerën marrëveshjes reciproke me Serbinë ia dijnë Partia Demokratike e Kosovës (PDK), dhe Lidhja Demokratike e Kosovës (LDK), duke shtuar se ato janë pasardhëse të LDK-së dhe UÇK-së.

”PDK dhe LDK ia dijne vleren thelbesore te marreveshjes me njohje reciproke sepse jane trashegimtare te UCK dhe LDK qe jane realizuesit e pavaresise se Kosoves, ndersa VV dhe as Kurti nuk ia dine vleren sepse nuk kane ekzistuar ne kohen e clirimit dhe pavaresimit te Kosoves“, ka shkruar Tahiri në Facebook, të dielën.

Më 18 mars në Ohër do të zhvillohet takimi i radhës në mes kryeministrit të Kosovës, Albin Kurtit dhe presidentit serb, Aleksandër Vuçiq.

Josep Borrell, shef i Bashkimit Evropian për Politikë të Jashtme dhe Siguri, ka deklaruar më 27 shkurt se ”Kurti dhe Vuçiq janë pajtuar që të  mos flasin më për planin franko – gjerman“, duke lënë të nënkuptohet se marrëveshja mund të nënshkruhet më 18 mars. 

(Kosova Sot Online)