Rama: E inkurajova Kurtin të bëj hapa për garantimin e komunave serbe në kornizën e asociacionit

Kryeministri i Shqipërisë, Edi Rama, tha se e ka inkurajuar Kurtin në “hedhjen e hapave të mëtejshëm qoftë për garantimin e komunave serbe në kornizën e asociacionit që garanton vetëmenaxhimin e komunitetit serb, qoftë për funksionimin me garancitë e nevojshme të Kishës Serbe në vendet e saj të kultit në Kosovë”,  transmeton gazeta "Kosova Sot Online".

“Me mikun e posaçëm, kryeministrin e Kosovës, Albin Kurti, gjatë drekës së sotme ku diskutuam me detaje për marrëveshjen e Ohrit dhe ecurinë e mëtejshme të procesit të zbatimit të saj”, shkroi Rama.

“I shpreha Albinit të gjithë simpatinë time për kurajon dhe realizmin me të cilin ka hedhur hapa me rëndësi të madhe drejt normalizimit të marrëdhënieve me Serbinë. E inkurajova kryeministrin në hedhjen e hapave të mëtejshëm, qoftë për garantimin e komunave serbe në kornizën e asociacionit që garanton vetëmenaxhimin e komunitetit serb, qoftë për funksionimin me garancitë e nevojshme të Kishës Serbe në vendet e saj të kultit në Kosovë, duke e siguruar se në këtë proces jo të lehtë ai ka mbështetjen time më të plotë”, shtoi kryeministri shqiptar në një postim në Facebook.

Ai tha se me Kurtin “ramë dakord që mbledhja e ardhshme e të dy qeverive të mbahet në qershor”.

(Kosova Sot Online)