Udhëzimi administrativ për largimin e kryetarëve në Veri nga 5 shtatori i publikuar në Gazetën Zyrtare

20 September 2023 - 12:45

Sipas këtij udhëzimi, një grup qytetarët ndërmarrin iniciativën për largimin e kryetarit të komunës dhe kjo kërkesë duhet të nënshkruhet nga 20 për qind e votuesve, transmeton "Kosova Sot Online".

Më pas qytetarët duhet ta themelojnë një grup nismëtar, i cili përbëhet nga 3 ose më shumë anëtarë.

Lexoni edhe:

Manchester United në aksion, përgatitë ofertën e lartë për yllin e Bayernit

Ky grup nismëtar para se të nisë mbledhjen e nënshkrimeve, duhet të njoftojë kuvendin e komunës përkatëse dhe KQZ-në. Kryesuesi i kuvendit komunal njofton kryetarin e komunës përkatëse, ministrinë përkatëse për pushtetin lokal dhe KQZ.

Kryesuesi i Kuvendit Komunal, jo më vonë se 5 ditë nga pranimi i njoftimit, shqyrton kërkesën dhe e regjistron grupin nismëtar si palë të autorizuar.

Më pas, jo më vonë se 5 ditë nga regjistrimi i grupit nismëtar i palë e autorizuar, kryesuesi i kuvendit kërkon nga KQZ numrin e përditësuar të votuesve të regjistruar në komunën përkatëse, dhe më pas e pajis grupin nismëtar me dokumentacionin përkatës.

Grupi nismëtar duhet që brenda 30 ditëve të mbledhë numrin e kërkuar të nënshkrimeve. Ky afat mund të shtyhet vetëm njëherë për 15 ditë.

Grupi nismëtar përgatitë dosjen e kërkesës me nënshkrime dhe ia dorëzon kryesuesit të kuvendit komunal. Një kopje të kërkesës me nënshkrime Grupi nismëtar mund ta dërgojë edhe në KQZ.

Kryesuesi i kuvendit komunal, brenda tre ditëve e dërgon kërkesën me nënshkrime në KQZ. Për dorëzimin e kërkesës, kryesuesi i kuvendit komunal njofton grupin nismëtar dhe Ministrinë.

Pastaj KQZ, në përputhje me legjislacionin në fuqi, verifikon listën e nënshkrimeve sipas afateve të përcaktuara. Pas verifikimit të nënshkrimeve, KQZ njofton kryesuesin e kuvendit komunal, grupin nismëtar dhe Ministrinë, me vlerësimin përfundimtar.

Pas verifikimit dhe konstatimit se kërkesa është mbështetur nga së paku 20% e votuesve të regjistruar, KQZ njofton kryesuesin e kuvendit komunal, kryetarin e komunës, grupin nismëtar dhe Ministrinë.

Në rast se konstatohet se kërkesa është mbështetur nga së paku njëzet për qind e votuesve të regjistruar, organizohet votimi për largimin e kryetarit të komunës nga funksioni nga KQZ.