Zbardhen detaje: Si e humbi jetën tragjikisht e reja nga Gjakova duke kërcyer nga ballkoni i një hoteli

Artila Kameri, 34-vjeçare, ka humbur jetën tragjikisht, në hotel ‘Venus’ në magjistralen Prishtinë – Lipjan, në orët e para të ditës së sotme, pasi e njëjta dyshohet se ka kërcyer nga ballkoni në katin e dytë, transmeton gazeta “Kosova Sot Online”.

Vdekjen e saj e ka konstatuar ekipi mjekësor në vendin e ngjarjes, teksa Policia ka nisur hetimet për të zbardhur rrethanat e rastit.

Sipas informacioneve të para, e ndjera ishte e shoqëruar në hotel nga një person.

Burimet bëjnë me dije se bëhet fjalë për Asdren Begolli, 32-vjeçar nga Peja.

Por si ndodhi ngjarja tragjike?

Rreth orës 03:30 tashmë e ndjera, Artila Kameri dhe Asdren Begolli, dyshohet të jenë përfshirë në një konflikt verbal me njëri-tjetrin.

Si rrjedhojë, 34-vjeçarja dyshohet se ka kërcyer nga tarraca e hotelit dhe si pasojë ka marrë lëndime të rënda trupore që rezultuan të jenë fatale për të.

Ekipi mjekësor i Emergjencës ka dalë në vendin e ngjarjes, ku kanë hasur në trupin e viktimës dhe pas ekzaminimeve për shenjat vitale kanë konstatuar vdekjen e saj.

Lidhur me rastin nga Policia thanë se me vendim të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore për obduksion.

“Aktualisht policia në koordinim me Prokurorinë  ka nisur dhe po ndërmerr të gjitha veprimet e duhura hetimore që do të ndihmonin hetimin dhe sqarimin e rastit, ndërkohë që trupi i pajetë i viktimës është dërguar për obduksion”, tha zëdhënësja, Flora Ahmeti.

(Kosova Sot Online)