Vazhdojnë kritikat nga eurodeputetja Kearns: Serbia po i qesh në fytyrë BE-së, qasja e Perëndimit ndaj Kosovës është e padrejtë

Të mërkuren, në Parlamentin Evropian është diskutuar për parregullsitë në zgjedhjet lokale dhe të përgjithshme në Serbi. Kritika të ashpra për vendin fqinj patën eurodeputetët, duke kërkuar nga udhëheqësit e shtetit që të hetojnë gjetjet e monitoruesve ndërkombëtar. Presidentja e Komisionit Evropian, Ursula von der Leyen, pas votimeve nga Parlamenti Evropian, mori një letër të mbështetur nga 24 politikanë të lartë evropianë, duke i kërkuar asaj që t’i hetojë akuzat për parregullsi në zgjedhjet e fundit në Serbi, transmeton "Kosova Sot Online ".

Siç raporton “Politico”, në mesin e nënshkruesve të kësaj thirrjeje që BE të nisë një hetim për zgjedhjet në Serbi, ishte edhe deputetja konservatore e Parlamentit Britanik dhe kryetare e Komitetit të Punëve të Jashtme të Parlamentit Britanik, Alicia Kearns.

Në një bisedë për “Zërin e Amerikës”, shërbimi për Gjeorgjinë në Uashington, deputetja britanike ka thënë se “kolegët që vëzhguan zgjedhjet thanë se nuk kishin parë kurrë abuzime të tilla të tmerrshme të procesit zgjedhor”.

Kearns ishte edhe ndër nënshkrueset e apelit që parlamentarët evropianë dhe amerikanë i dërguan administratave në Uashington dhe Bruksel verën e kaluar, me të cilin kërkohej që të shtrëngojnë politikën ndaj Serbisë dhe ta zbusin atë ndaj Kosovës. Ajo gjithashtu akuzoi Beogradin për kontrabandë armësh në Kosovë përmes Kishës Ortodokse Serbe, të cilën KFOR-i më vonë e mohoi.

Kearns tani ka bërë thirrje përsëri për një ndryshim në politikën e ShBA-së dhe BE-së ndaj Beogradit dhe pretendon se “Serbia po qesh përballë Bashkimit Evropian”.

“Ata pretendojnë se po shkojnë drejt së ardhmes euroatlantike, por në fakt janë të lidhur me Rusinë, me Iranin, kanë zgjedhur aleatët e tyre. Ata aktualisht po i qeshin BE-së në fytyrë, po i marrë paratë e tyre dhe nuk po ecin përpara në çështjen e reformave. Duhet që qasja e BE-së dhe ShBA-së të jetë e drejtë dhe e balancuar. Qasja aktuale ndaj Kosovës është e padrejtë, e pabalancuar dhe e gabuar, dhe ata duhet të paralajmërojnë se Serbia do t’i bartë pasojat dhe t’i jepet fund këtij iluzioni që kanë – se Serbia po punon për një të ardhme euroatlantike”, tha deputetja britanike.

(Kosova Sot Online )