Podujevë: Policia arreston një 37-vjeçar që synonte të shiste monedha 2 euroshe false – i sekuestrohen 10 mijë euro

Policia e Kosovës ka njoftuar se gjatë një aksioni në Podujevë ka arrestuar një person, i cili ka tentuar të shiste para false, përcjell “Kosova Sot Online”.

Rasti ka ndodhur në fshatin Shakovicë të Podujevës.

I dyshuari gjatë realizimit të masave të fshehta të hetimit nga hetuesit policorë, ka ofruar për shitje 5000 copë monedha nga 2 euro (5000×2=10000). I dyshuari këtu monedha synonte t’i shiste për 6 mijë euro.

Gjatë kontrollit në veturën e tij, Policia ka gjetur dhe sekuestruar 5 mijë monedha 2 euroshe që dyshohet se janë të falsifikuara, 3 kartëmonedha 20 euro që dyshohet të jenë poashtu të falsifikuara, veturën e përdorur dhe një telefon celular.

“I dyshuari është intervistuar në prezencën e avokatit mbrojtës të caktuar sipas detyrës zyrtare. Me aktvendim të prokurorit kujdestar, i dyshuari dërgohet në mbajtje për 48 orë”, thuhet në njoftim.

(Kosova Sot Online)