Votimi i 21 prillit, KQZ njofton se nis periudha për ndërrimin e qendrës së votimit brenda komunës
Komisioni Qendror i Zgjedhjeve ka njoftuar se ka filluar periudha për ndërrimin e qendrës së votimit brenda komunës për procesin e votimit që do të mbahet më 21 prill, përcjell “Kosova Sot Online”.
“Komisioni Qendror i Zgjedhjeve njofton qytetarët me të drejtë vote se ka filluar periudha për ndërrimin e Qendrës së Votimit brenda komunës për procesin e votimit për apo kundër largimit të kryetarëve nga funksioni në komunat Leposaviq, Zubin Potok, Zveçan dhe Mitrovicë e Veriut, që do të mbahet më 21 prill 2024.”
“Gjatë kësaj periudhe, e cila do të përfundojë më 3 prill 2024, qytetarët me të drejtë vote nga këto komuna mund ta mësojnë qendrën e tyre të votimit dhe nëse dëshirojnë edhe ta ndërrojnë atë, duke e caktuar sa më afër vendbanimit të tyre.”
KQZ ka treguar se si mund të bëhet parashtrimi i kërkesës.
“Parashtrimi i kërkesës për ndërrimin e Qendrës së Votimit brenda komunës mund të bëhet përmes platformës së vendosur në ueb faqen e KQZ-së ëëë.kqz-ks.org apo në vegzën direkte https://eomp.kqz-ks.org/sq dhe kjo do të shqyrtohet nga shërbimi votues i KQZ-së. Ndërrimi i Qendrës së Votimit është i mundur edhe duke paraqitur kërkesën në Komisionin Komunal të Zgjedhjeve, në komunën përkatëse.”
“Po ashtu, KQZ njofton qytetarët me të drejtë vote nga këto katër komuna se deri më 5 prill 2024 është afati për të kundërshtuar pasaktësitë apo lëshimet në Listën Votuese, duke paraqitur kundërshtimin e tyre në Zyrën e Komisionit Komunal të Zgjedhjeve në komunën përkatëse apo përmes e-mailit adresës: [email protected]”
