Një nxënëse kosovare sulmohet sek*sualisht në shkollë nga mësuesi i saj

Vajzat dhe gratë po vazhdojnë të jenë viktimat më të ngacmimeve e sulmeve seksuale. Raste të tilla kanë ndodhur jo rrallëherë edhe në institucione arsimore e në afërsi të tyre – çka ka ngritur shqetësim te prindërit, transmeton gazeta “Kosova Sot Online”.

Kështu dyshohet se ka ndodhur edhe së fundmi në fshatin Dubravë në Kaçanik, ku viktimë është një 16-vjeçare, e cila dyshohet se është sulmuar seksualisht nga mësuesi i saj.

Burimet brenda Prokurorisë kanë bërë me dije se rasti dyshohet se ka ndodhur brenda hapësirave të shkollës, ku vajza kishte shkuar për disa prova, pasi i dyshuari ishte mësimdhënës i muzikës.

Sipas informacioneve të para, i dyshuari e ka puthur viktimën fillimisht në faqe e më pas e ka prekur në të pasme, duke i shkaktuar shqetësim e frikë nxënëses.

Përballë kësaj situate, vajza është larguar nga shkolla dhe e ka denoncuar rastin, ndërsa Policia është vënë në lëvizje për ndërmarrjen e veprimeve të nevojshme.

Si rezultat, i dyshuari është identifikuar dhe arrestuar nga Policia.

Të njëjtat burime kanë bërë me dije se gjatë intervistimit, i dyshuari ka deklaruar se nuk ka pasur qëllim seksual ndaj nxënëses.

Ndaj tij, Prokurori i Shtetit ka urdhëruar masën e ndalimit policor dhe inicimin e hetimit.

(Kosova Sot Online)