Lexoni edhe:
Me gjykim të drejtë të kontestit mes Telekomit me Z-Mobile paratë e plaçkitura dhunshëm me direktiva politike të rikthehen të gjitha në llogari të ndërmarrjes publike
Pastrimi i plotë i listave të veteranëve nga ata që i blenë çertifikatat
Hajrullah Tërnava
Shkruan: ANALISTI – Hajrullah Tërnava
Spastrimi i listave të veteranëve do ta mbyllte këtë çështje të diskutuar tani e nga mbarimi i luftës, dhe do ti zbulonte abuzuesit e fondit të veteranëve, e sidomos ata që i kontribuuan një falsifikimi të tillë që me vetëdije ua nënshkruan ato certifikata duke e fryrë numrin e veteranëve me përmasa të jashtëzakonshme, numër aspak real si pjesëmarrës në luftën çlirimtare.
-Qeveria e ka marr seriozisht dhe është e përkushtuar që më në fund ti spastron të gjitha të këqijat që i janë bërë këtij vendi, sepse këtë premtim ua pati dhënë kjo parti në pushtet elektoratit që kur e votuan me mbi 50%. Në këtë drejtim tani ka paralajmërime se do të fillohet edhe me spastrimin e listave të veteranëve, të atyre që i kanë ble certifikatat dhe marrin paga sikur të ishin veteran të vërtetë. Edhe pse ka kaluar një kohë e konsiderueshme, gjithnjë ekziston mundësia e verifikimeve, edhe pse tash mbas 22 viteve do të ketë vështirësi për t’ia arritur atij qëllimi, por me një angazhim permanent do të arrij ti nxjerr në shesh qeveria Kurti, besoj së bashku me hetuesin, të gjitha dallaveret që janë bërë me fryrjen e listave për veteran të luftës, pas procesit të iniciuar për hetim dhe korrigjim të listave.
Ata që kanë „gishta“ në ato veprime kriminale lidhur me listat e veteranëve po ju frikësohen tani pushtetarëve të tanishëm pasi që po paralajmërohet për rishikimin, hetimin dhe pastrimin e këtyre listave të fryra të veteranëve. Arsyeja e kundërshtimit është frika nga zbulimi dhe turpërimi para opinionit publik të ish zyrtarëve të lartë të zinxhirit komandues të UCK-së, por edhe komandantëve të vegjël të zonave së bashku me vartësit e tyre, për të cilët ka pasur akuza se kanë bërë tregti me certifikatat e veteranit të luftës, gjë që solli edhe trefishimin e numrit të ushtarëve të UCK-së, veteran të pas luftës të cilët janë bërë barrë e rëndë për buxhetin e shtetit. Paralajmërimi për rishikim të listave nuk është mirëpritur nga subjektet politike që kanë qeverisur në dy dekadat e kaluara, madje nga ish kryeministri Haradinaj kundërshtimi i kësaj nisme është bërë edhe në foltoren e Kuvendit të Kosovës. Haradinaj madje ka thënë se është fyese kjo çfarë po synon Albin Kurti të bëjë me çështjen e luftëtarëve të lirisë, sipas tij. Ai ka thënë se nuk është koha që tash Kurti të merret edhe me çështjen e veteranëve.
Mirëpo vetë ish ushtarët, tash veteran të vërtetë të luftës e pohojnë një skandal të tillë të cilin po ashtu e kanë pohuar dhe pranuar edhe vetë aktorët politik, figura qendrore të luftës, Hashim Thaçi e Kadri Veseli. Kryetari i Këshillit për Mbrojtjen e të Drejtave të Veteranëve të UÇK-së, Xhevdet Qeriqi, vendimin e Qeverisë Kurti për listat e ka vlerësuar pozitivisht, duke thënë se listat e veteranëve duhet të ri verifikohen dhe ka shtuar se veteranët e vërtetë nuk janë aspak të kënaqur me listat aktuale. Qeriqi thotë se për “fryrje” të listave të veteranëve ka folur edhe me ish-krerët e UÇK-së, Kadri Veselin dhe Hashim Thaçin.
“Edhe atëherë nuk jam pajtuar. I kam kundërshtuar. Jam takuar me ish-krye parlamentarin Veseli, i cili më tha se është i pakënaqur dhe numri nuk është i saktë. Të njëjtën më ka thënë edhe ish-presidenti Thaçi në dy takime që pata me të. Ai më tha se listat e veteranëve janë fryrë tej mase”, ka thënë Qeriqi. Për shkak të fryrjes së listave me veteran të shpikur, Qeriqi ka thënë se shumë luftëtar, veteran të vërtetë dhe të dinjitetshëm kanë mbetur jashtë atyre listave dhe të njëjtit po përballen me probleme të rënda, si shëndetësore dhe të tjera, prandaj nuk ka asgjë të keqe që të ri verifikohen, dhe ata që janë keqpërdorues t’i kthejnë ato mjete. Ditë më parë kryeministri i Kosovës, Albin Kurti, ka pritur në takim edhe përfaqësuesit nga Organizata e Veteranëve të Luftës së Ushtrisë Çlirimtare të Kosovës, me të cilët u diskutua edhe çështja e pastrimit të listave.
Përfaqësuesit e OVL-së janë shprehur të gatshëm për të gjetur mundësitë e bashkëpunimit Qeverinë në procesin e fillimit të verifikimit dhe pastrimit të listave, nismë kjo që po kundërshtohet nga ish kokat në pushtet që e lejuan fryrjen dhe manipulimin e tyre. Spastrimi i listave të veteranëve do ta mbyllte këtë çështje të diskutuar tani e nga mbarimi i luftës, dhe do ti zbulonte abuzuesit e fondit të veteranëve, e sidomos ata që i kontribuuan një falsifikimi të tillë që me vetëdije ua nënshkruan ato certifikata duke e fryrë numrin e veteranëve me përmasa të jashtëzakonshme, numër aspak real si pjesëmarrës në luftën çlirimtare.
Shkrimet në këtë rubrikë nuk shprehin qëndrimet e gazetës "Kosova Sot Online".
