Messi kishte dashur ta braktiste Barcelonën për të luajtur për Jose Mourinhon
Lionel Messi ishte tunduar për t’u larguar nga Barcelona në vitin 2004, për të luajtur nën urdhrat e trajnerit Jose Mourinho në Chelsea.
Sulmuesi argjentinas kishte shprehur gatishmëri për të luajtur për trajnerin portugez, me të cilin e kishte zhvilluar një bisedë të gjatë telefonike atë botë.
Sipas gazetarit të respektuar italian Gianluca Di Marzio, ajo ishte hera e parë që Messi e kishte menduar largimin nga Camp Nou, por marrëveshja me Chelsean nuk ishte arritur.
Kapiteni argjentinas mbeti pjesë e Barcelonës dhe tani, 16 vjet më vonë, në moshën 33-vjeçare, kërkoi përsëri të largohet.
Megjithatë, presidenti i Barcelonës Josep Maria Bartomeu nuk ia plotësoi dëshirën atij dhe këmbënguli se kushdo që e dëshiron Messin duhet t’i paguajë 700 milionë euro për të.
Messi vendosi të qëndrojë dhe ta përmbushë kontratën, e cila i mbaron verën e ardhshme, pavarësisht thashethemeve se Manchester City i Pep Guardiolës e dëshironte.
(Kosova Sot Online)