Pas Rashicës dhe Paqaradës, edhe Muriqi do të mungojë për Kosovën shkaku i Covid-19

  • G.G /
  • 09 November 2020 - 10:19
Pas Rashicës dhe Paqaradës, edhe Muriqi do të mungojë për Kosovën shkaku i Covid-19

Vedat Muriqi pritet t’i shtohet listës së mungesave në ekipin kombëtar të Kosovës për ndeshjet e këtij muaji, miqësore dhe në Ligën e Kombeve, për shkak të kufizimeve të pandemisë koronavirus.

Sulmuesi i Lazios Muriqi do t’i bashkohet Milot Rashicës së Werder Bremenitdhe Leart Paqaradës së St. Pauli në listën e mungesave për Kombëtaren e Kosovës këtë muaj.

Njëlloj si Rashica dhe Paqarada, edhe Muriqi u ftua nga trajneri i Kosovës Bernard Challandes për ndeshjen miqësore kundër Shqipërisë më 11 nëntor në Elbasan dhe për dy ndeshjet e fundit në grup në Ligën e Kombeve kundër Sllovenisë në Lubjanë dhe ndaj Moldavisë në Prishtinë, por nuk do të jetë në gjendje të paraqitet.

Kufizimet e vendosura nga autoritetet shëndetësore në Gjermani për mbrojtje ndaj Covid-19, i kanë shtyrë klubet e Rashicës dhe Paqaradës të mos i lejojnë lojtarët e vet t’u bashkohen Kombëtareve të tyre përkatëse.

Fatin e njëjtë e përjetoi edhe Muriqi, i cili dëshpëroi me paraqitjen e tij në barazimin e Lazios 1:1 me Juventusin, pasi autoritetet lokale në Itali ua kanë ndaluar klubeve të caktuar t’i lejojnë lojtarët t’u bashkohen kombëtareve të veta përkatëse.

Ndër to është edhe Lazio.

Muriqi e mposhti virusin në fillim të tetorit, por kjo nuk pritet të bëjë përjashtim për të.

Lojtarëve nga klubet si Fiorentina, Genoa, Inter, Lazio, Roma dhe Sassuolo u ndalohet t’iu bashkohen kombëtareve të tyre për shkak se detyrohen të futen në karantinë, sepse në klubet e tyre është gjetur të paktën një rast me koronavirus brenda kësaj jave.

Muriqi, Rashica dhe Paqarada do të mungojnë në miqësoren kundër  Shqipërisë dhe në dy ndeshje vendimtare për fatin e Kosovës në Grupin 3 të Ligës C, pasi dardanët dëshirojnë ta shmangin rënien në Ligën D – kategorinë e fundit të kësaj gare.

Ata do ta humbin mundësinë për të luajtur kundër Sllovenisë më 15 nëntor në Lubjanë dhe tri ditë më vonë kundër Moldavisë në Prishtinë.

Kosova është e parafundit në grup me vetëm 2 pikë, tetë më pak se liderja Sllovenia dhe një më shumë se vendi i fundit, Moldavia. 

(Kosova Sot Online)