Betohet Koeman, këmbëngul se Barcelona mund ta fitojë La Ligën në këtë sezon

  • S.A /
  • 14 dhjetor 2020 - 08:39
Betohet Koeman,  këmbëngul se Barcelona mund ta fitojë La Ligën në këtë sezon

Ronald Koeman nuk pranon të heqë dorë nga titulli në La Liga këtë sezon, pavarësisht se skuadra e tij po e përjeton fillimin më të dobët të sezonit në rreth 30 vjetët e fundit.

Barcelona vuajti për ta mposhtur 1:0 Levanten të dielën në Camp Nou, në një tjetër paraqitje aspak bindëse.

Katalonasve iu desh të prisnin gjatë për ta thyer akullin. Kapiteni Lionel Messi e shënoi golin e fitores dhe rrjedhimisht tri pikëve të rëndësishme për Barçën në pjesën e dytë.

Kjo fitore i ndihmon asaj t’i afrohet liderit të tanishëm të La Ligës, Real Sociedad, në vetëm nëntë pikë.

“Natyrisht se ne mund ta fitojmë (titullin)”, tha Koeman pas fitores së skuadrës së tij kundër Levantes.

“Nëse përmirësohemi dhe kemi më shumë vetëbesim dhe e përmirësojmë efektivitetin para portës, atëherë kemi mundësi! Kanë mbetur edhe shumë ndeshje për t’u zhvilluar”, shtoi ai.

(Kosova Sot Online )