Arbëria përforcohet me një sulmues brazilian
Arbëria e ka transferuar sulmuesin brazilian Marclei Cezar Santos, si përforcimin e parë në afatin kalimtar të dimrit, në luftën e saj për të mbetur në Superligë.
Marclei kaloi te klubi i Lipjanit nga Feronikeli, ku kishte luajtur në pjesën e parë të sezonit 2020/21 në elitën e futbollit kosovar.
Arbëria e mbylli gjysmën e parë të sezonit në pozitën e gjashtë me 21 pikë të mbledhura nga 18 ndeshje, vetëm dy më shumë se zona e rënies nga liga.
Synimi i skuadrës së Arbnor Morinës është ta sigurojë mbetjen në elitë edhe për sezonin e ardhshëm, pasi u promovua sezonin e kaluar.
Braziliani 31-vjeçar i bëri vetëm gjashtë paraqitje për Feronikelin që prej se iu bashkua në gusht dhe ia doli t’i shënojë tri gola dhe ta dhurojë një asistim.
Arbëria nuk i ka bërë të ditura detajet e marrëveshjes me Marclei, në njoftimin për transferimin e tij.
“KF Arbëria i uron mirëseardhje në familjen tonë futbollistit brazilin Marclei Cezar – Santos Së fundi ishte pjesë KF Feronikeli, dhe u bashkua klubit tonë në afatin kalimtar të janarit! Santos vjen me një pervojë të madhe, dhe luan në poziten e qendër sulmuesit”, thuhet në njoftimin e klubit.
“KF Arbëria i dëshiron sukses dhe shendet, duke uruar ta bëjë më të miren e tijë!
(Kosova Sot Online)