Ibrahimovic gëzon tifozët para ndeshjes me Juventusin: “Tik tak, tik tak”

Zlatan Ibrahimovic mund të jetë gati për derbin që Milani të mërkurën do ta zhvillojë me Juventusin.

Suedezi është jashtë aksionit që nga 22 nëntori kur u dëmtua në fitoren 3-1 të Kuqezinjve në shtëpinë e Napolit.

39-vjeçari ka punuar shumë që nga ajo kohë për të zbritur sërish në fushë dhe gjasat janë që ta shohim të mërkurën, edhe pse nuk është stërvitur ende me ekipin, por i diferencuar.

Ai i ka dhënë shpresa tifozëve se mund ta kenë të gatshëm luanin e tyre për sfidën me Juven, të paktën në stol, pasi përmes një postimi në ‘Twitter’, ai ka publikuar një video dhe ka shënuar “Tik tak, tik tak”.

Një sinjal se së shpejti do të rikthehet në fushë dhe Stefano Pioli, pas fitores 2-0 ndaj Beneventos, gjithashtu tha se shpreson për diçka të tillë.

“Ibra po punon për t’u rikuperuar, nuk e di nëse do të jetë i gatshëm”. 

(Kosova Sot Online)